පුරාවිද්‍යාව බහුවිධ විෂයක් වන අතර ලෝකය පුරා දැන් දැන් විවිධ විද්‍යාත්මක ක්‍රමවේදයන් මේ සදහා සීග්‍ර ලෙස භාවිතයට ගනිමින් සිටි. එමගින් පුරාවිද්‍යා විශ්ලේෂණ සහ අර්ථකථන නව නැම්මක් ඔස්සේ ඉදිරිපත් කිරීමටත් වඩා නිවැරදිතාවයකින් පුරාවිදු පර්යේෂණ සිදුකිරීමටත් හැකියාව ලැබී තිබේ. ශ්‍රී ලාංකේය පුරාවිද්‍යා ක්ෂේත්‍රයටද නවතම විද්‍යාත්මක ක්‍රමවේදයන්හි ආගමනය සිදුවෙමින් පවතී. ලොවපුරා සිදුවන බොහොමයක් පර්යේෂණ සහ සොයාගැනීම් අන්තර් ජාතික සඟරා වල පලවන්නේ ඉංග්‍රීසි භාෂාවෙනි. එමෙන්ම එම තොරතුරු බොහොමයක් පලවන්නේ විද්‍යාත්මක සහ පර්යේෂණ ලේඛණ රටාවෙනි. එනිසා මේ පිලිබඳ උනන්දුවක් දක්වන ලාංකේය ජනතාවටත්, පර්යේෂකයන්ටත්, විශ්වවිද්‍යාලවල පුරාවිද්‍යාව හදාරන ශිෂ්‍ය ශිෂ්‍යාවන්ටත් සහ පාසල් දරු දැරියන්ටත් සරලව එම තොරතුරු ගෙන ඒම “විද්‍යා වින්දන” තුලින් සිදුවේවි.

මෙමගින් පුරාවිද්‍යා ක්ෂේත්‍රයට අදාල නවතම විද්‍යාත්මක සොයා ගැනීම්, පැහැදිලි කිරීම් සහ අධ්‍යාපනික තොරතුරු ඉදිරිපත් කිරීමට බලාපොරොත්තුවේ.   

නියන්ඩතාල් මානවයාගේ මුතුන්මිත්තන්.....

වර්තමානයේ “ස්පැනිෂ්” ගල්ගුහාවෙන් හමුවූ පොසිල හිස්කබල් සමූහය මානව වංශ කතාවේ තවත් අපුරු සම්බන්ධයක් විදහා දක්වයි. ඒ නියන්ඩතාල් මානවයාට නෑකම් කියන එයට පෙර විසු ඔහුගේ මුතුන්මිත්තෙක් ගැනයි. සොයාගන්නා ලද හිස්කබල් 17 න් හෙලිදරව්ව් වූ කරුණු වලින් පැහැදිලි වන්නේ ඔවුන් නියන්ඩතාල් මානවයාට සමීප ලක්ෂණ පෙන්වන බවත් ඔහුට බොහෝ පෙර, ආසන්න වශයෙන් අවුරුදු 430 000 කට පමණ කාලයක විසූවන් ලෙසයි.  නියන්ඩතාල් මානවයාට සමීප නමුත් මිශ්‍ර ලක්ෂණ මගින් පෙන්නුම්කරන මෙම පොසිල, සංකීර්ණ සහ සෙමින් දීර්ඝ කාලයක් තිස්සේ නියන්ඩතාල් මානවයාගේ සිදුවූ විකාශනයකට කදිම සාක්‍ෂි බව කියා සිටින්නේ මෙම පර්යේෂණය සිදුකල ස්පාන්ඥ්ඥයේ මැඩ්රීඩ් විශ්වවිද්‍යාලයේ භූවිද්‍යා පීඨයේ පොසිල විද්‍යාඥ ජුවන් ලුවිස් අර්සුගා මහතායි.

උත්තරාර්ධ ගෝලයේ මීට අවුරුදු  200 000 කට පමණ පෙර සැරිසැරූ නියන්ඩතාල් මානවයා අවුරුදු 30 000-10 000 අතර කාලයකදී මිහිමතින් වඳව ගිය අතර සේපියන් මානවයාට බොහෝම ළඟ නෑකම් කියුවෙකි. යුරේසියා මහද්වීපයේ (යුරෝපය සහ ආසියා එකතුව) ශීත කාලගුණික තත්ව යටතේ සිටි මොවුන්, වර්තමාන සමහර විද්‍යාඥයන් විසින් සේපියන් මානවයාගේ උප විශේෂයක් ලෙසත් තවත් සමහරක් සේපියන් මානවයාගෙන් වෙන් වූ විශේෂයක් ලෙසත් හඳුන්වයි. ජාන විශ්ලේෂණ පර්යේෂණ වලට අනුව ඩි.එන්. ඒ. සමුච්චයන්ගේ වෙනස වන්නේ 0.12% පමණි. මෙතෙක් ලැබී ඇති පොසිල සාධක අනුව, මොවුන් බටහිර යුරෝපයේ සිට මධ්‍යම සහ උතුරු ආසියාව පුර පැතිර සිට ඇත.

ස්පැනිෂ් ගල්ගුහාවෙන් හමුවූ පොසිල හිස්කබල වල පෙන්නුම් කරන “ඉදිරියට නෙරුණු දත් සහ නිකට” යමක් තදින් අල්වා ගැනීමට සහ රඳවා ගැනීමට කල භාවිතය නිසා ඇති වූ විකරණ ලෙස පැහිදිලි වන බව තවදුරටත් පවසන මෙම විද්‍යාඥ්ඥයා පසු කාලින නියන්ඩතාල්ගේ ජීවනය සඳහා එය  මහත් උපකාරයක් වන්නට ඇතැයි නිගමනය කරයි. එමෙන්ම මෙම සාක්‍ෂි වලට අනුව මෙම හිස්කබල් සත්‍ය නියන්ඩතාල් ලෙස හදුන්වන මානවයාට පෙර සිටි තවත් මානව විශේෂයකට අයත් වන අතර මෙම දෙකොටසම එකම පූර්වජයකුගෙන් බිහිවන්නට ඇති බව විස්වාස කරයි. මෙවැනි විශේෂ තවත් බොහොමයක් නියන්ඩතාල් බිහිවන්නට මත්තෙන් ඉන්නට ඇතැයි විශ්වාස කෙරේ.

සේපියන් සහ නියන්ඩතාල් මානවයන්ගේ කපාල ධාරිතාව අනෙකුත් විශේෂ වලට වඩා වැඩි අතර එම ප්‍රමාණ චිම්පන්සියකුගේ මෙන් දෙගුණයක් පමණ වේ. නමුත් නියන්ඩතාල් ගේ කපාල ධාරිතාව සේපියන් ගේ කපල ධාරිතාවට වඩා වැඩිය. ස්පැනිෂ් ගල්ගුහාවෙන් හමුවූ පොසිල හිස්කබල වල කපාල ධාරිතාව මෙම විශේෂ දෙකටම වඩා අඩු බව විශ්ලේෂණ වලින් පැහදිලි වී ඇත. මෙලෙස කපාල ධාරිතාවල වෙනස ඇතිවන්නට අත්තේ එකිනෙකට වෙනස් ක්‍රියාදාමයක ප්‍රථිපලයක් ලෙස වන්නට ඇතැයි මෙම විද්‍යාඥ්ඥයා විශ්වාස කරන අතර සේපියන් මානවයාගේ ප්‍රගමනයටත් නියන්ඩතාල් මානවයාගේ වඳ වීමටත් හේතුවන්නට ඇතැයි උප කල්පනය කරයි..

මෙම මානව පොසිල “ස්පැනිෂ්” නම් වූ ගල්ගුහාවෙන් හමුවූවා සේම නියන්ඩතාල් මානව පොසිල බොහොමයක් හමු වී ඇත්තේද ගල්ගුහාවලිනි. ප්‍රථම නියන්ඩතාල් පොසිලය හමූ වුයේ 1829 එන්ගිස් නම් වූ බෙල්ජියමේ ගල්ගුහවකිනි. “නියන්ඩතාල්” නාමය ස්ථාපිත වීමට හේතු වූයේද ජර්මනියේ ඩසල්ඩොෆ් ප්‍රදේශයේ “නියන්ඩර්” නම් වූ නිම්නයේ ගල්ගුහාවකින් 1856 දි හමු වූ පොසිලයකි. 1864 දී ඇන්ග්ලෝ-අයිරිෂ් භූ විද්‍යාඥයකු වන විලියම් කිංග් නැමැත්තා විසින් “Homo neanderthalensis” ලෙස ද්විපද නාමකරණය යෝජනා කරන ලදී. 

තොරතුරු ලබාගත්තේ....

Arsuaga et al. Neandertal roots: Cranial and chronological evidence from Sima de los Huesos. Science 20 June 2014:  1358-1363.

Fossil Human Skulls Unearthed in Spanish Cave Shed Light on Neandertal Evolution. Popular Archaology.19June 2014. Vol. 15 06052014.

ආචාර්ය පත්මකුමාර ජයසිංහ