විදු පත් ඉරුව
20.04.2016.

බොන්නට තැබූ ජල බඳුනේ කොණ්‌ඩ කුරුල්ලෙක්‌ ගිනි මද්දහනේ බැහැගෙන නානවා. උන්ටත් මේ දිනවල තියෙන දාහය දරන්න බැරුව ඇති. සතා සිවුපාවට විතරක්‌ නො වෙයි අපි හැමෝටමත් මේ දිනවල පවතින දාහය දරාගන්න අමාරුයි. සිංහල අවුරුද්ද මේ දාහය අස්‌සෙම ගෙවිලා ගියාට තියෙන රස්‌නය නම් දැන් ම ගෙවෙන පාටක්‌ නෑ වගේ. වෙන දා වහින බක්‌ මහේ වර්ෂාවටත් බැරි උනා මේ දාහය නිවාලන්න. ශ්‍රී ලංකාව වගේ සමකය ආසන්න රටවලට තමයි මේ තත්ත්වය ප්‍රබලව බලපාන්නේ. 2015 වසර ගෙවුණේ මේ තත්ත්වය ඇති කරගෙන. මේ පිළිබඳ පර්යේෂණ කරන විද්‍යාඥයන් සිතුවට 2015 උණුසුම් ම වර්ෂය වෙයි කියලා 2016 දී ලෝක උණුසුම තවත් වර්ධනය වෙයි කියලයි ඔවුන් දැන් අනුමාන කරන්නේ.

අපි හොඳින් ම දන්නව නේ සූර්යයා තමයි අපිට ශක්‌තිය ලබා දෙන්නේ කියලා. අපව උණුසුම් කරන්නේත් සූර්යයා. එපමණක්‌ නො වෙයි ලෝකයේ පැවැත්ම තීරණය කරන්නෙත් සූර්යයා. හැබැයි මේ දිනවල පවතින උණුසුම ඇති කරන්න ප්‍රධාන හේතුව වෙලා තියෙන්නේ නම් "එල් නිනෝ" නම් ක්‍රියාවලියක්‌. දැනටමත් මේ නම අහලා ඇති. ඔබ දන්නව ද එල් නිනෝ ක්‍රියාවලිය (ආචරණය) හටගන්නේ කොහොම ද කියලා. මෙය බැලූ බැල්මට බොහොම සරල ක්‍රියාවලියක්‌. ලෝකයේ උණුසුම පාලනය කරන්න සාගර ජලය ඉතා විශාල කර්තව්‍යයක්‌ ඉටු කරන බවයි පෙන්වා දී තිබෙන්නේ. සාගර මතුපිට ඇති ජලය හිරු ගේ උණුසුම උරාගෙන ගැඹුරේ ඇති සීතල ජලය සමග මිශ්‍ර කරමින් තමයි මේ පාලනය සිදු කරන්නේ. සාමාන්‍ය කාලවල දී එය එසේ වුණත් එල් නිනෝ කාලවල දී මේ ක්‍රියාවලිය අවුල් වෙනවා. ඒකට හේතු වන්නේ සාගර ජලය අසාමාන්‍ය ලෙස වැඩිපුර සූර්ය තාපය උරාගැනීම කියලයි විද්‍යාඥයන් පවසන්නේ.

සාගරයේ ජල ස්‌තර අතුරින් ඉහළින් ම ඇති මීටර සියයේ ජලය උණුසුම්. ඉන් පහළට යත් ම උණුසුම අඩු වන අතර ගැඹුරේ සීතල ජලය සමග මිශ්‍ර වෙමින් මේ උණුසුම් ජලය පහළ බහිනවා. මෙය විද්‍යාඥයන් හඳුන්වන්නේ සිරස්‌ මිශ්‍රණය කියලයි. සිරස්‌ මිශ්‍රණය සිදු නො වූ විට රත් වූ ජලය තිරස්‌ ලෙස ගමන් කරන අතර එනිසා වෙන දාට වඩා වැඩියෙන් වායුගෝලය උණුසුම් කරනවා. මෙනිසා අධික වාෂ්පීකරණයෙන් වායුගෝලයේ ජල වාෂ්ප ප්‍රමාණය වැඩි කරන්නේ සමකාසන්න රටවලට අධික උණුසුමක්‌ ඇති කරමින්. විශේෂයෙන් ම පැසිµsක්‌ සාගර කලාපයේ ඇති වන මේ අක්‍රමවත් ක්‍රියාදාමය නිසා මුළු ලෝකයේ ම බොහොමයක්‌ ප්‍රදේශවලට අසාමාන්‍ය කාලගුණික තත්ත්වයන් නිර්මාණය කරනවා. මානව ක්‍රියාකාරකම් නිසා මේ ක්‍රියාවලිය තවත් ප්‍රබල වෙලා කියලයි විද්‍යාඥයන් දැන් දැන් පවසන්නේ.

එල්නිනෝ උණුසුම නිසා ඇති වන වියළි කාලගුණික තත්ත්වය කිසියම් ප්‍රමාණයකට ලෝකය අකර්මණ්‍ය කරන බව පැහැදිලියි. ඒ කාලගුණික අසාමන්‍යතා ඇති කරමින්. මේ නිසා වර්ෂා රටාව වෙනස්‌ වීම පමණක්‌ නො වේ දැනට සොයාගෙන ඇති විද්‍යාත්මක කරුණුවලට අනුව පැහැදිලි වන්නේ වායුගෝලයේ ඉහළ ස්‌තරවල ඇති ඕසෝන සාන්ද්‍රණයට පවා අහිතකර බලපෑම් ඇති කරන බවයි. ගොඩබිමෙහි උණුසුම වැඩි වීමට සමානුපාතිකව පොළොවෙහි මතුපිට ස්‌තර වියළී යැම කිසියම් ප්‍රමාණයකට ලැව් ගිනි ඇති කිරීමට හේතු වන බව නොරහසක්‌. ලැව් ගිනි ඇති වීම වායුගෝලයේ කාබන් අංශු සහ කාබන්ඩයොක්‌සයිඩ් ප්‍රමාණය වැඩි කිරීමට හේතුවක්‌ බව අමුතුවෙන් කියන්න ඕනේ නැහැ නේ.

මේ උණුසුම් කාලගුණික තත්ත්වය ඉන්දියාව, ඉන්දුනීසියාව සහ සිංගප්පූරුව ප්‍රමුඛ ආසියාවේ රටවලට පමණක්‌ නො ව ඔස්‌ටේ්‍රලියාව වැනි මහාද්වීපවලට ද බලපාන බව පෙනී යන කරුණක්‌. උතුරු ඇමෙරිකාවේ සීත කාලගුණය මෙනිසා සමනය කරන අතර හිම වැටීම අඩු කරනවා. මේ අතර දකුණු ඇමෙරිකාවේ තත්ත්වය හාත්පසින් ම වෙනස්‌. එහි අධික වර්ෂාපතනයක්‌ ඇති කරන අතර පේරු, ඉක්‌වදෝර් සහ චිලි වැනි රටවලට මෙය ප්‍රබලව බලපානවා. මේ තත්ත්වය එක්‌තරා ආකාරයකට ඔවුනට වාසිදායක තත්ත්වයක්‌. ඒ මන්ද යත් මේ හේතුවෙන් එම ප්‍රදේශවල මුහුදේ මත්ස්‍ය ගහනය වැඩි වී වැඩිපුර මත්ස්‍ය අස්‌වැන්නක්‌ ලැබීමයි. එහෙත් යුරෝපයට නම් මේ තත්ත්වය බලපාන ආකාරය පැහැදිලිව තවමත් වටහාගෙන නැහැ. කොහොම වුණත් මේ එල් නිනෝ තත්ත්වය සාමාන්‍යයෙන් වසර හතරකට පමණ වරක්‌ ඇති වන්නක්‌. මෙතෙක්‌ සිදු වී ඇති රටාව අධ්‍යයනය කළ විට එයට වඩා අඩු කාලයක දී පවා එල්නිනෝ නැවත ඇති වී ඇති බව පෙනී යනවා.

"ලා නිනා"ව මේ රටාව උඩුයටිකුරු කරනවා. මෙනිසා ලා නිනා කාලයක දී එල් නිනෝ කාලවල වියළි කාලගුණික රටාවක්‌ පෙන්වූ ප්‍රදේශවලට ඉතා අධික වර්ෂාපතනයක්‌ ගෙන දෙනවා. ඒ වාගේ ම අධික වර්ෂාපතනයක්‌ ලද ප්‍රදේශවලට වියළි කාලගුණික තත්ත්වයක්‌ ඇති කරනවා. සාගරයේ ඉහළ ස්‌තරවල ජලය වැඩිපුර සිසිලනය වීමෙන් තමයි මේ තත්ත්වය ඇති වන්නේ. කොහොම වුණත් එල් නිනෝ සහ ලා නිනා යන ක්‍රියාවලි දෙකෙන් ම සිදු වන්නේ සාමාන්‍ය කාලගුණ තත්ත්වය වෙනස්‌ කරන එකයි.

මේ පවතින උණුසුම අඩු වන්න තව සති කිහිපයක්‌ ගත වේ වි. එතෙක්‌ අප ගේ සෞඛ්‍යය රැකගන්න වගබලාගත යුතුයි. හැකි සැම විට ම පාහේ ජලය පානය කිරීම ඉතා වැදගත්. ඒ වාගේ ම බෙලිමල්, රණවරා වැනි දේශීය පානයන් ද ඔබට පානය කළ හැකියි. එළිමහනේ වැඩකටයුතු කිරීමේ දී පරෙස්‌සම් විය යුතුයි. විශේෂයෙන් ම අධිකව මහන්සි වන කටයුතුවල දී. කොහොම වුණත් ඒ සියල්ල ම කරන ගමන් සතා සිවුපාවටත් දාහය නිවාගන්න ජල බඳුනක්‌ දෙකක්‌ තියන්න අමතක කරන්න එපා.

ආචාර්ය පත්මකුමාර ජයසිංහ

විදු පත් ඉරුව
13.04.2016

ඔන්න දන්නෙ ම නැතුව සිංහල අලුත් අවුරුද්දත් කට ළඟට ම ඇවිල්ලා. බක්‌ මහ කියන්නේ ඉතිං ශ්‍රී ලාංකිකයන්ට අතිශය වැදගත් මාසයක්‌ නේ. තමන් ගේ වගාවේ අස්‌වැන්න නෙළලා හා පුරා කියලා ගෙට ගන්නේ බක්‌ මහේ. ඒ නෙළාගත්ත අස්‌වැන්නේ සතුට සමරන්න අපේ පැරැන්නන් සංවිධානය කරපු මංගල්‍යයක්‌ තමයි අලුත් අවුරුද්ද කියන්නේ. කොටින් ම හැම දේ ම අලුත් කරමින් තවත් නව පරිච්ඡෙදයක්‌ අරඹන්න ලක ලැහැස්‌ති වෙන්න තමයි අපේ මුතුන්මිත්තන් අලුත් අවුරුදු චාරිත්‍ර කළේ.

පැරැන්නන් අවුරුදු සමරන්න අස්‌වැන්න නෙළීම මූලික කරගත්තත් අද වෙනකොට ගොවි සංස්‌කෘතිය බොහෝ දුරට අපෙන් වියෑකිලා ගිහින් කියන එක අමුතුවෙන් කියන්න දෙයක්‌ නැහැ. ඒ හින්දා අද බොහෝ දෙනෙක්‌ අලුත් අවුරුද්ද සමරන්නේ සංකේතයක්‌ නැතිනම්

පැරැණි සංකෘතික අංගයක්‌ ලෙසයි කියලා පැහැදිලියි.

ඇත්තට ම අද වෙනකොට ශ්‍රී ලංකාවේ ගොවි සංස්‌කෘතිය බරපතළ අර්බුදයකට ලක්‌ වෙලා තියෙන බව අප හැමෝට ම හොඳින් තේරුම් යන දෙයක්‌. ඒ ආකාර කිහිපයකින්. එකක්‌ තමයි ගොවිතැන සිදු කරන ගොවියා ගේ ජවය පිරිහෙමින් පැවතීම. ඒකට උදාහරණයක්‌ විදියට මාරාන්තික වකුගඩු රෝගයට රජරට ගොවියා ලක්‌ වී තිබීම දක්‌වන්න පුළුවන්. තවමත් නිසි ප්‍රතිකර්මයක්‌ මීට සොයා නො ගැනීම නිසා ඔවුන් තවත් අසරණ වෙලා. වගකිවයුතු විද්‍යාඥයින් ලෙස අප මේ සම්බන්ධව කණගාටුවට පත් විය යුතුවා වාගේ ම එක්‌ එක්‌ මත කෙරෙහි එකිනෙකා ගේ ඇති කුළල් කාගැනීම නතර කොට සාමූහික ප්‍රයන්තයක යෙදිය යුතු කාලය එළඹිලයි තිබෙන්නේ. ගොවීන් ගේ ජවය පිරිහීමේ පවතින බරපතළ ප්‍රතිවිපාකය තමයි ගොවිතැනේ දක්‌ෂයන් ක්‍රමයෙන් තුරන් වී යැම. එනිසා අනාගත ගොවි පරම්පරාව හීන වෙලා මතු ජාන සම්ප්‍රේෂණය ඇනහිටීම සිදු වේ වි. ගොවිතැනේ විවිධ ක්‍රම විධි දැන සිටින දක්‌ෂ ගොවීන් හිඟ වීම අනාගත ශ්‍රී ලංකාවට අති විශාල පාඩුවක්‌ වේ වි. මේ තත්ත්වය වර්ධනය වීම මෙරට අනාගත ආහාර නිෂ්පාදනයේ ගැටලු ඇති කරන්නක්‌ වේ වි. ඒ වාගේ ම සාම්ප්‍රදායික ගොවිතැන අතහැර නවීන රසායනික ගොවිතැනට ගොවීන් රාජ්‍ය අනුග්‍රහය ඇති ව පෙලඹවීමත් මේ අර්බුදකාරී තත්ත්වයන් ඇති කිරීමට මූලික හේතුවක්‌ බවයි අපට හැඟෙන්නේ. එක්‌තරා ක්‍රමවත් රටාවකට හුරු වී සිටි හෙළ ගොවියා අහසින් පහත් වූ ක්‍රමවේද අනුගමනය කිරීමේ ප්‍රතිඵල අද භුක්‌ති විඳිමින් සිටින බව හොඳින් පැහැදිලි වෙනවා.

රසායනික ද්‍රව්‍ය භාවිතය හේතු කොටගෙන සරුසාර පස විෂ සහිත වී ඇති බව ඔබ නො දන්නවා නො වේ. බොහොමයක්‌ රසායනික ද්‍රව්‍ය බොහෝ කාලයක්‌ පසෙහි රැඳෙන ඒ වාගේ ම ඒවායේ විඛණ්‌ඩක පවා හානිදායක රසායනිකයන් වීම සුවිශේෂී කරුණක්‌. මේ තත්ත්වය පසුගිය දශක ගණනක සිට දිගින් දිගට ම පැවතීම පසෙහි ජීව ගුණය අතුරුදන් කරවන්නට හේතු වී තිබෙනවා. මේ හේතු කොටගෙන ක්‌ෂුද්‍රජීවීන් ප්‍රමුඛ අනෙකුත් පාංශු ජීවීන් ද පසෙන් තුරන් වී අවසානයි. එපමණක්‌ නො වේ, විෂ රසායනිකයන් භූගත ජලයට ද මතුපිට ජලයට ද එක්‌ වී හමාරයි. මෙලෙස විෂ රසායනිකයන් ජලයට මුසු වීම වෙනත් බොහෝ ස්‌ථානවලට එම විෂ ගෙන යැමට හේතුවක්‌. එය තව දුරටත් ජලය වගේ ම පස ද දූෂණය කරන්නක්‌. මේ විදියට තව බොහෝ ආකාරවලින් මේ බැඳීම් ක්‍රියාත්මක වීම සිදු වන අතර ක්‍රමයෙන් පාරිසරික ජීව ගුණය පහත හෙළන බව රහසක්‌ නො වේ. මේ තත්ත්වය නො හික්‌මුණු නවීන විද්‍යාවේ එක්‌තරා අතුරුඵලයක්‌ බව නො කියා ම බැහැ.

මෙනයින් බලන කල ශ්‍රී ලාංකිකයන් වන අපට අනාගතයේ දී ඉතා ප්‍රබල අභියෝග ගණනාවකට මුහුණ පෑමට සිදු වන අතර ජීවිතය පවත්වාගැනීමට නම් ඒවා අනිවාර්යයෙන් ම ජයගැනීමට සිදු වේ වි. ඉන් ප්‍රබල ම අභියෝගය වන්නේ විෂ රහිත ආහාර නිෂ්පාදනයක්‌ සදහා ප්‍රතිපත්ති සහ ක්‍රමවේද සම්පාදනයයි. සාම්ප්‍රදායික ගොවිතැන් ක්‍රමවේද ප්‍රචලිත කිරීමේ සිට නව ක්‍රමෝපා නිපැයුම් දක්‌වා වූ අතිවිශාල පරාසයක මේ වෙනස සිදු කළ යුතුයි. යුග ගණනාවක්‌ තිස්‌සේ පවත්වා ගෙන එන ශ්‍රී ලාංකික මිනිසුන් ගේ ජාන හුරුව හඳුනාගැනීම සහ එයට ගැලපෙන ආහාර රටාවක්‌ උදෙසා ක්‍රමවේද සකස්‌ කිරීම කෙරෙහි විශේෂ සැලකිල්ලක්‌ දැක්‌විය යුතු වනවා. ඒ වාගේ ම වගා කිරීම සදහා වැදගත් වන සුදුසු පසක්‌ ඇති කිරීමට පවතින "විෂ පස" සුවපත් කිරීමේ ක්‍රමවේද ඇති කළ යුතුයි. ලෙඩ රෝග සදහා ඔරොත්තු දෙන බෝග වර්ග තෝරාගැනීම ද මෙහි ලා අතිශය වැදගත් කටයුත්තක්‌.

දෙවැනි, එහෙත් පළමු වැන්නට ද වඩා විශාල බලපෑමක්‌ කළ හැකි අභියෝගය වන්නේ පිරිසිදු ජල නිධි පවත්වාගෙන යැමයි. බොහොමයක්‌ නගරාශ්‍රිත ව මෙන්ම කාර්මිකකරණය වූ ප්‍රදේශවල මතුපිට මෙන්ම භුගත ජල නිධි ද වර්මානයේ දූෂණය වී හමාර බව පර්යේෂණවලින් පෙන්වා දී තිබෙනවා. නමුත් වාසනාවකට කඳුකරයේ ද, ග්‍රාමීයව ද පවතින ජල නිධි සුරැකි ව තිබීම සැනසිල්ලට කරුණක්‌. එවැනි ජල නිධි ක්‍රමානුකූල භාවිතය සහ කළමනාකරණය උදෙසා යහපත් වැඩපිළිවෙළක්‌ සකස්‌ වීම අනිවාර්යයි. එහි එක අංගයක්‌ ලෙස දැනට පිරිසිදුව පවත්නා ජල නිධි සිතියම්ගත කිරීම සහ ප්‍රමාණාත්මක ගණනය සදහා සමීක්‌ෂණ වහ වහා සිදු විය යුතුයි. දූෂණයට ලක්‌ වූ ජල නිධි යථා තත්ත්වයට පත් කිරීමේ ක්‍රමවේද කෙරෙහි විද්‍යාත්මක පර්යේෂණ මෙහෙයවිය යුතුයි.

සමගාමීව ජයගත යුතු එහෙත් වැඩි පරිශ්‍රමයක්‌ යෙදිය යුතු වන්නේ දෙවැන්නටයි. මන්ද යත් ආහාර නිෂ්පාදනයද රඳා පවත්නේ ජලය මත වීමයි. කෙසේ වෙතත් අනාගතයේ අනෙකුත් සියලු ම ප්‍රශ්නවලට වඩා ප්‍රමුඛ වන්නේ උක්‌ත කරුණු අරභයා ඇති වන ගැටලු ජාලයයි. එනිසා මේ අලුත් අවුරුද්දේ දේශපාලනිකව ද, ජාතීන් ලෙස ද, ආගමිකව ද නො බෙදී අප අවධානය යොමු කළ යුත්තේ අප හමුවේ ඇති මේ ප්‍රබල අභියෝග ජයගන්නා උපක්‍රම සෙවීම ගැනයි.

ආචාර්ය පත්මකුමාර ජයසිංහ

විදු පත් ඉරුව

06.04.2016

මෙරට ඉතිහාසය විකෘත වෙමින් යන්නේ ද යන්න මෑත කාලයේ මසිතෙහි හටගත් ගැටලුවකි. ඊට හේතු වන සාධාරණ සාක්‌ෂි වරින් වර විවිධ ලෙස මතු වෙමින් තිබේ. ජාතික තලයේ පත්තර ද, නා නා ප්‍රකාර වෙබ් අඩවි හා බුකියේ පිටු ද විවිධ ආකාරයේ අරමුණු මුල් කරගෙන නො දන්නා ඉතිහාසයක්‌ ගොඩන ගමින් සිටියි. සමහරකුට අනුව මෙරට ලොව තිබූ ප්‍රබල ම රට ය. ඔවුනට අනුව මෙරට මුල් කරගෙන ලෝක ශිෂ්ටාචාර බිහි වී ඇත. තවත් සමහරකුට අනුව විජය එන තෙක්‌ මෙරට විසුවෝ ගෝත්‍රිකයෝ ය. ඔවුනට අනුව විජය පැමිණීමෙන් පසු ශිෂ්ටාචාර බිහි වූ අතර ඉන්දියාව අප ශිෂ්ටාචාරයේ ප්‍රාරම්භකයා විය. ඒ අතර සමහර පුරාවිද්‍යා ඉතිහාසඥයෝ විද්‍යාත්මක පර්යේෂණ යෑයි පවසමින් කැණීම් ද කරමින් තමන් ගේ මතය තහවුරු කරන කරුණු පමණක්‌ එළිදක්‌වමින් සිටිති. ඔවුන් සමහරකුට අනුව ලංකාවේ ප්‍රාග් ඓතිහාසිකයෝ කන්ද උඩරට විසූවෝ වෙති. පසුව පරිණාමයත් සමග පහළට බැස්‌සෝ ඔවුහු ය. තවත් අයකුට අනුව ඔවුන් පහළින් ඉහළට සංක්‍රමණය වූ හ. ඒ සදහා සාක්‌ෂි ද සපයනු ලැබේ. සමහරු එහෙටත් නැති මෙහෙටත් නැති බහුබූත ද දොඩවති.

වර්තමානයේ අප දරුවන් රටෙහි ඉතිහාසය, ශ්‍රී ලාංකික මානවයා ගේ පරිණාමය ගැන ඉගෙනගන්නේ මෙවැනි පසුබිමක ය. විද්‍යාත්මක තර්කණය පලා ගොසිනි. විද්‍යාත්මක ක්‍රමවේද භාවිතය සහ බහු විෂයාත්මක ප්‍රවේශය ගවු ගාණක්‌ ඈත ය. එහෙන් මෙහෙන් අහුලාගත් කරුණු ගොනු කර නිගමනවලට එළඹෙති. මේ සදහා කදිම උදාහරණ බොහෝ ඇත. සමහර ඒවා මා ද අත්දැක ඇත. වසර කිහිපයකයට ප්‍රථම වර්තමානයේ මෙරට ප්‍රසිද්ධියට පත් පුරාවිද්‍යා පර්යේෂකයකු ගේ කැණීමක්‌ බැලීමට අහඹු අවස්‌තාවක්‌ මම ලදිමි. ඒ අප ගේ පර්යේෂණ කටයුත්තකට යන ගමනෙහි අතර මැද ය. මා භූ විද්‍යාඥයකු බැවින් එහි කැණීමෙන් ලද ද්‍රව්‍ය ගොනුවක්‌ මා ඉදිරියේ තබා යමක්‌ ප්‍රකාශ කළ හැකි දැයි ඔහු විමසා සිටියේ ය. බොහොමයක්‌ ඉතා තදින් ජීර්ණය වී තිබූ අතර යම් යම් ඛනිජ ද පාෂාණ ද මට හැකි අයුරින් හඳුනා ගත්තෙමි. සරල පැහැදිලි කිරීමක්‌ ද මා විසින් සිදු කරන ලදි. "බෝල" නැත හොත් "ගුලි" මෙන් වූ ඛනිජ විශේෂයක්‌ එහි වූ අතර එම ගුලි ප්‍රදේශයේ මිනිසුන් "රාවණා ගුලි" ලෙස හඳුන්වන බව ඔහු පවසා සිටි අතර ඔහු ගේ වැඩි අවධානයක්‌ එම ද්‍රව්‍ය කෙරෙහි යොමු වී තිබිණි. අධිකව ජීර්ණය වී තිබූ මේ ද්‍රව්‍යය හඳුනාගැනීමට තරමක්‌ අසීරු වුව ද ප්‍රදේශයේ පාෂාණ සහ ඛනිජ පිළිබඳව තරමක අවබෝධයක්‌ මා සතු ව තිබූ බැවින් එම ද්‍රව්‍යය බොහෝ විට "ගානට්‌" නැත හොත් "රබහ" නම් ඛනිජය විය හැකි බව ද එම ප්‍රදේශයේ "ඇල්මන්ඩින් ගානට්‌" නම් ඛනිජය තිබූ නිසා මේවා එම ඛනිජයේ ජීර්ණිත කොටස්‌ විය හැකි බව ද මම තවදුරටත් පවසා සිටියෙමි. එහෙත් මේ කරුණු තහවුරු කරනු වස්‌ තවදුරටත් භූ විද්‍යාත්මක පර්යේෂණ කළ යුතු බව ද මම පවසා සිටියෙමි. පුදුමයක මහත...ෘ කැණීම අවසාන වන්නට ද ප්‍රථම, එම ප්‍රදේශයේ එකල සිටි පැරැණි ජනතාව යකඩ නිෂ්පාදනය සදහා යොදාගෙන ඇත්තේ "ඇල්මන්ඩින් ගානට්‌" නම් ඛනිජ විශේෂය බවට සාක්‌ෂි හමු වූවා යෑයි කරුණු ප්‍රසිද්ධ විය. එය අසා සිටි මා බොහෝ පුදුමයට පත් වූ අතර එලෙස කරුණු ප්‍රසිද්ධ වීම සම්පූර්ණයෙන් ම සාවද්‍ය බව මා හට අමුතුවෙන් වටහාගැනීම අනවශ්‍ය නො වී ය. එනිසා ඔවුන් ගේ පර්යේෂණ නිගමන කොපමණ දුරට සත්‍ය දැයි ගැටලුවක්‌ ඇත.

පැරැණි යකඩ කර්මාන්තය පිළිබඳව අප කළ පර්යේෂණයකින් හෙළි වූයේ මෙතෙක්‌ ශ්‍රී ලංකාවේ යකඩ නිෂ්පාදනය සදහා යොදාගෙන ඇත්තේ "හිමටයිට්‌" නම් වූ යකඩ ප්‍රතිශතය වැඩි ද්විතීයික ඛනිජයක්‌ බවයි. යම් ද්‍රව්‍යයක්‌ තම කැණීමෙන් හෝ පර්යේෂණයට භාජන වන භූමියෙන් හමු වූ පමණින් ම එවැනි නිගමනවලට එළඹීම කෙතරම් අනුවණ දැයි තේරුම්ගත යුතු ය. අප පර්යේෂණයට භාජන කළ ස්‌ථානවල සමහරක්‌ අවස්‌ථාවල දී "මැග්නටයිට්‌" නම් වූ ඛනිජය ද හමු ව ඇති අතර එම ද්‍රව්‍ය යකඩ නිස්‌සාරණයට ගෙන නොමැති බව ඉඳුරා ම පැහැදිලි විය. එහෙත් මේ ක්‌ෂේත්‍රයේ සිදු කළ තවත් පර්යේෂණයක අවසාන නිගමනය වී ඇත්තේ ශ්‍රී ලංකාවේ යකඩ නිස්‌සාරණය සදහා යොදාගෙන ඇත්තේ මේ "මැග්නටයිට්‌" නම් ඛනිජය බවයි. එහෙත් එම නිගමනය ගැටලුකාරී ය. "මැග්නටයිට්‌" උණු කළ හැකි නිස්‌සාරණ තාක්‌ෂණයක්‌ ලංකාවේ මෙතෙක්‌ හමු වී නොමැත.

මහාවංශයට අනුව විජය ගොඩබසින්නේ තම්බපන්නි නම් වූ ස්‌ථානයකට ය. එය බොහෝ දුරට බස්‌නාහිර වෙරළෙහි එක්‌ ස්‌ථානයක්‌ විය හැකි බව සමහර පුරාවිද්‍යාඥයන් ගේ සහ ඉතිහාසයඥයන් ගේ මතයයි. ඇත්තෙන් ම එය කොපමණ දුරට සත්‍ය ද යන්න විද්‍යාත්මක පර්යේෂණ මඟින් තවමත් විසඳී නොමැත. තම්බපන්නි යන නම පටබැඳෙන්නේ තම අත්ල තඹ පැහැ ගත් හෙයිනැයි එහි තවදුරටත් කියෑවේ. ඇත්තෙන් ම ඔය කියනා ස්‌ථානයේ බොහෝ ප්‍රදේශයක්‌ පුරා පැතිර ඇත්තේ රතු පැහැගත් පස්‌ සහ වැලි ය. මේ බිහි වීම සදහා හේතු වන්නේ අතීතයේ එක්‌ කලක දී ඇති වූ අධික සූර්ය තාපය හේතුවෙන් එහි වූ යකඩ ඔක්‌සිකරණය වීමයි. ඔක්‌සිකරණය වූ යකඩ රතු පැහැති ය. රතු සහ තඹ යනු පැහැයන් දෙකකි. අප රටෙහි දකුණු වෙරළෙහි බේරුවල ප්‍රදේශයේ මොනසයිට්‌ නම් වූ කහ පැහැ ගත් ඛනිජ වැලි නිධි හමු වේ. මේ කහ පැහැය බොහෝ දුරට තඹ පැහැයට හුරු ය.

ඕනෑ ම අවස්‌ථාවක දී නිගමනවලට එළඹීම ඉතා පරෙස්‌සමෙන් කළ යුතු ය. ඒ සදහා බොහෝ කරුණු එක්‌රැස්‌ කරගත යුතු ය. විටෙක නොවැදගත් යෑයි ඉවත දමන සාක්‌ෂි අතීතය විදහාපාන හොඳ ම සාක්‌ෂි විය හැකි ය. එනිසා තිබෙන කරුණු මුල් කරගෙන නිගමනවලට එළඹෙනවා මිස තම මතය තහවුරු කිරීම සදහා කරුණු ගොනු කිරීම සාවද්‍ය මත මුල් බැසගැනීම සදහා හේතු වේ. ශ්‍රී ලංකික පුරාවිද්‍යා ක්‌ෂේත්‍රය තුළ මෙවැනි මත බහුල ය. මෙරටෙහි අනාගත පුරාවිද්‍යාඥයන් මේ කරුණ ඉතා හොඳින් සිත්හි තබාගත යුතු ය. ඒ සදහා ක්‍රියාත්මක විය යුතු ය. ඉතිහාසය සැඟවීම සහ විකෘති කිරීම අනාගතයට අප කරන ඉතා දරුණු අසාධාරණයකි.

ආචාර්ය පත්මකුමාර ජයසිංහ

විදුපත්ඉරුව

අද ශීඝ්‍ර දියුණුවක්‌ අත් කරගෙන සිටින චීනය විසින්, හැටේ දශකයේ අග භාගයේ තම කෘෂිකර්මාන්තයේ අභිවෘද්ධිය උදෙසා, තෝරාගත් සතුන් හතර දෙනකු සමූලඝාතනය කරන්නට තීරණය කරන ලදි. මැස්‌සන් ද, මදුරුවන් ද, මීයන් ද සමග චීනයේ බහුලව වෙසෙන ගේ කුරුල්ලකු මේ පළිබෝධයන් හතර දෙනා විය. විශේෂයෙන් ම "යුරොපීය රුක්‌ ගේ කුරුල්ලා" ගැන චීන ආණ්‌ඩුවට වූයේ ඉතා කරදරකාරී හැඟීමකි. ඒ කිසිවක්‌ නිසා නො ව, ගණනයන්ට අනුව වසරක දී එක්‌ ගේ කුරුල්ලෙකු වී කිලෝ 4.5ක්‌ පමණ කා දමන නිසා ය. එමෙන් ම අවසානයේ දී මිලියනයක පමණ ගේ කුරුල්ලන් ගෙන් හානි වන්නේ මිනිසුන් 60,000ක ආහාර බව ද ගණනය කර තිබිණි. මිලියන සියයකට වැඩි ප්‍රමාණයක්‌ වූ ගේ කුරුල්ලන් හට චීනයේ මේ තීරණය නිසා ජීවිත පූජා කරන්නට සිදු විය.

චීන ආණ්‌ඩුවට වැරදුණු බව තේරුම් යැමට වැඩි කාලයක්‌ ගත නො වී ය. මේ ගේ කුරුල්ලන් කා දමන්නේ ධාන්‍ය පමණක්‌ නො වන බවත් වගාවට හානි කරන අනෙකුත් කෘමීන් ද ඒ අතර වන බවත් ඔවුනට පසුව පැහැදිලි විය. එහෙත් ඒ වන විට ඔවුන් බොහෝ ප්‍රමාද වී තිබිණි. එනිසා අපේක්‌ෂා කළ ලාභය නො ව අවසානයේ දී ඔවුනට මුහුණ පෑමට සිදු වූයේ අනපේක්‌ෂිත අලාභයකට ය.

පරිසරයේ වෙසෙන සතුන් සහ ශාක අතර ඇත්තේ අපට සිතාගැනීමටවත් නොහැකි තරම් වූ කදිම සම්බන්ධතාවකි. ආහාර ජාලයේ එක පුරුකක්‌ ඉවත් කළ විට සමස්‌ත පද්ධතියේ ම සමතුලිත බව බිඳ වැටෙන්නේ එනිසා ය. ලෝක ඉතිහාසයේ මෙවන් සිදුවීම් තව බොහෝ ඇත. ඒ හැම දෙයකින් ම තුලිත පරිසරයක්‌ උදෙසා සොබාදහමේ ඇති සැම අංගයක ම වැදගත්කම කියා පායි.

මානව දියුණුවත් සමග ඒ හා සමගාමීව ඔවුනට සතුරු පළිබෝධයන් රැසක්‌ ද බිහි වන බව අමුතුවෙන් ඔබට විස්‌තර කළ යුතු නො වේ. ගම් නගර බිහි වත් ම සොබාවිකත්වය ඈත් වේ. එනිසා ම මේ පළිබෝධයන් වනසන ස්‌වාභාවික සතුරන් ද හිඟ වේ. නැත හොත් ස්‌වාභාවික සතුරන් නොමැති ම වේ. මේ අනුව අප ගේ ක්‍රියාකාරකම් ද ඔවුන් ගේ ශීඝ්‍ර වර්ධනයට රුකුල් දෙන බව පෙනෙයි.

මීයන් ද, කැරපොත්තන් ද, මැස්‌සන් ද, මදුරුවන් ද අප අත නො හැර ම මානව පරිසරයේ රැඳී සිටින සත්ත්ව කාණ්‌ඩ වෙයි. ඔවුන් ගෙන් අපට එල්ල වන උපද්‍රව සහ හානි නිසා බොහෝ ආර්ථික අලාභ සිදු වේ.

මේ අතරින් මීයන් ගෙන් සිදු වන හානිය ඉතා සුවිශේෂී වේ. වාර්තාවලට අනුව පාචනය, මී උණ, ජලභීතිකාව ඇතුළු ලෙඩ රෝග 34ක්‌ සදහා මීයන් හේතුකාරක වෙයි. ගණනය කර ඇති ආකාරයට වසරක දී මීයන් ගෙන් මානවයාට සිදු වන හානිය ඇමෙරිකානු ඩොලර් බිලියන 400ක්‌ පමණ වේ.

කලින් සදහන් කළ පරිදි මේ සදහා බොහෝ විට අනුබල දෙන්නේ අප ගේ නොසැලකිලිමත් ක්‍රියාකාරකම් බව බොහෝ දෙනකු නො දන්නවා ඇත. මීයන් ගේ ආගමනය වැඩි වන්නේ ගෙවල ඇතුළත ද පිටත ද ඉතා නිදහස්‌ ලෙස ද බහුල ලෙස ද ආහාර ලබාගැනීමට හැකි වීම නිසා ය. භාවිතයෙන් පසු ආහාර ක්‍රමවත්ව අසුරා නො තිබීම, ඉඳුල් ආහාර ක්‍රමවත්ව බැහැර නො කිරීම යනාදී පුරුදු මී ගහනය වැඩි කරන්නටත් අදාළ ස්‌ථානවලට ඔවුන් කැඳවීමටත් හේතු වේ.

කොළඹ සහ තදාසන්න ප්‍රදේශවල අඳුර වැටෙන විට පමණක්‌ නො ව දහවල් කාලයේ දී ද ගොඩනැගිලි, කඩවල් සහ කුණු කාණු ආශ්‍රිත ව සැරිසරන මීයන් දුලබ දසුනක්‌ නො වේ.

මී උවදුරෙන් මිදීමට නොයෙකුත් උපක්‍රම භාවිත කරන මුත් ඒ එක්‌ ක්‍රමවේදයකින් හෝ නිසි ප්‍රතිඵල ලබාගැනීමට නොහැකි වී ඇති බව ද පෙනී යන කරුණකි. වර්තමානයේ මීයන් මර්දනයට බහුලව විෂ රසායනික ද්‍රව්‍ය භාවිත කෙරෙයි. මේ අතරින් "කූමරින්" (Coumarin) නම් වූ රසායනිකය භාවිත වන්නේ රුධිර ප්‍රතිකැටිකාරකයක්‌ (anticogulant) ලෙසිනි. මෙමගින් මීයන් හට හානි කළ හැකි බව සොයාගත් පසු මීයන් නැසීම සදහා පළිබෝධනාශකයක්‌ ලෙස භාවිත කරන්නට මිනිසුන් පෙලඹී ඇත. අනෙකුත් මී නාශක මෙන් නො ව මීයා ගේ මරණය ගෙන දෙන සාන්ද්‍රණය අත් කරගැනීම සදහා කිහිප වතාවක්‌ ම මේ රසායනිකය ශරීරගත විය යුතු ය. එමගින් අභ්‍යන්තර රුධිර වහනය වී මීයා මරණයට පත් වේ.

කොළඹ නගරවාසීන්ට මී උවදුරෙන් ගැලවීම සදහා කොළඹ නගර සභාව නොමිලේ රසායනිකය ලබා දෙන්නට තීරණය කර ඇත. එය එක්‌ අතකින් කෙතරම් හොඳ තීරණයක්‌ වුව ද අහිතකර පැති ද ඇති බව විමර්ශනය කළ යුතු ය. ලබා දෙන ප්‍රමාණය කොපමණ ද යන්න මෙහි දී ඉතා වැදගත් ය. එය නිශ්චය කරන්නේ කෙසේ ද? කොපමණ වතාවක්‌ ලබා දෙනවා ද? යන්න සැලකිය යුතු කරුණු ය. ඒ සියල්ල හා බැඳී පවතින්නේ නිකරුණේ කොපමණ ප්‍රමාණයක්‌ මේවා පරිසරයට එකතු වන්නේ ද යන්නයි. එමෙන් ම එම ප්‍රමාණය නැවත පරිසරයෙන් ඉවත් කළ හැකි ද යන්නත් ඉතා වැදගත් ප්‍රශ්නයකි. මේ විෂද්‍රව්‍ය භාවිතය නිසා ඉලක්‌කගත නො වන අය ද බලපෑමට ලක්‌ විය හැකි ය. ඒ අතර කුඩා දරුවන්, බල්ලන් සහ පූසන් වැනි සුරතල් සතුන්, මාළුන් වැනි ජලාශ්‍රිත සතුන් ද විශේෂයෙන් ම මීයන් මත යෑපෙන බස්‌සන් සහ උකුස්‌සන් වැනි කුරුල්ලන්, කබරගොයින් සහ සර්පයන් ද පමණක්‌ නො ව එම ආහාර ජාලයේ ඉහළින් ඉන්නා අනෙකුත් සතුන් ද සිටිය හැකි ය. එලෙස වූ අවස්‌ථා ලොව නන් දෙසින් වාර්තා වෙයි. එපමණක්‌ නො ව මෙලෙස කුඩා ප්‍රදේශයකට ලබා දෙන පීඩනයෙන් මීයන් මර්දනය කෙතරම් දුරකට සාර්ථක ව කෙරෙයි ද යන්න ද ගැටලුසහගත ය.

මීයන් සමූලඝාතනයේ පසු ප්‍රතිඵල චීන ගේ කුරුල්ලන් ඝාතනය සේ ම නො සිතු අහිතකර ප්‍රතිපල ගෙන එන්නට බැරි නැත. එනිසා සමූලඝාතනය නො ව පාලනයකට ලක්‌ කිරීම වඩාත් යෝග්‍ය බව අප ගේ අදහස ය. ඒ සදහා සත්ත්වයා වෙත යොමු වීමට පළමුව අප ගේ අඩුපාඩු නිවැරැදි කරගත හැකි නම් මැනවි. විශේෂයෙන් ම නිසි පරිදි නිසි කල කාබනික අපද්‍රව්‍ය බැහැර කිරීම ඉතා වැදගත් ය. ආහාර අපතේ නො යෑවීම ද එහි එක්‌ වැදගත් පියවරකි.

ආචාර්ය පත්මකුමාර ජයසිංහ

විදු පත් ඉරුව
23.03.2016

තම සුඛ විහරණය හා පැවැත්ම ගැන පමණක්‌ ම මූලික කරගත් ගමනක්‌ යෙදී සිටින මානවයා තමා රැඳී සිටිනා ස්‌වාභාවික පරිසරය තම පෞද්ගලික නිර්මිතයක්‌ බවට පත් කරන්නේ අනෙකුත් ජීවීන් සහ ශාක ගැන තුට්‌ටුවකට වත් මායිම් කරමින් නො වේ. ඔහු ගේ එම ක්‍රියාකාරකම් නිසා පරිසරය විටෙක ඉතා වේගයෙන් ප්‍රතිචාර දක්‌වයි. විටෙක එය බොහෝ මන්දගාමී සහ දිගුකාලීන වේ. පරිසරය දිගුකාලීනව දක්‌වන ප්‍රතිචාර නිසා වුව ද අප අපහසුතාවට පත් වන්නේ ඒ වන විටත් එම ක්‍රියාවලිය බොහෝ දුර ක්‍රියාත්මක වී ඇති නිසා ය. ජීව විවිධත්වයට හානි වීම ද මිනිස්‌ ජීවිත අහිමි වීම ද පමණක්‌ නො ව, අවසානයේ එම පරිසර තත්ත්ව යථා තත්ත්වයට පත් කරන්නට යන විට අධික මුදලක්‌ වැය කරන්නට ද සිදු වේ.

1956 වර්ෂයේ දී ජපානයේ මිනමටා ප්‍රදේශයේ "චිසෝ" සමාගමේ රෝහලට ඇතුළු වූ අවුරුදු පහක්‌ වයසැති දරුවාට ඇවිදීමේ සහ කතා කිරීමේ අපහසුතා ඇති ව තිබිණි. පසුව ඔහු ගේ සහෝදරියකට ද එම රෝගය වැළඳී රෝහල්ගත කරන ලද අතර, පසුව එම ප්‍රදේශයේ සිදු කරන ලද සමීක්‌ෂණයෙන්, එලෙස රෝගී වූ අට දෙනකු හමු විය. පැතිරී යන ආසාදන තත්ත්වයක්‌ ලෙස එකල මෙය හඳුන්වා දුන් අතර එමගින් ස්‌නායු පද්ධතියට හානි වන බව වෛද්‍යවරුන්ට පැහැදිලි වී තිබිණි. 1950 දී පමණ එම ප්‍රදේශයෙන් ම හඳුනාගැනුණු  "බළල් නැටුම් රෝගය" (Cat dancing disease)ට බොහෝ සමාන වූ ලක්‌ෂණ මේ රෝගී වූ දරුවන් ද පෙන්වන බව සොයාගැනිණි.

කුමාමොටෝ සරසවියේ පර්යේෂකයන් විසින් සිදු කරන ලද අධ්‍යයනවල දී මිනමාටා මුහුදු තීරයේ ධීවර කර්මාන්තයේ යෙදුණු පවුල්වලින් රෝගීන් බහුලව වාර්තා වූ බව සොයාගන්නා ලදී. ඔවුන් ගේ ප්‍රධාන ආහාරය වූයේ මාළු සහ කරවල බව ද ඒවායේ අඩංගු කිසියම් රසායනික ද්‍රව්‍යයක්‌ මේ රෝගය සදහා හේතු විය හැකි බව ද පර්යේෂකයෝ විශ්වාස කළ හ. රෝගීන් ගේ හිසකෙස්‌ විශ්ලේෂණයට භාජන කළ අතර එහි දී රසදිය (Mucurry) සාන්ද්‍රගත වී ඇති බව ඔවුනට වාර්තා විය. මේ රෝගය සදහා හේතු වී ඇත්තේ රසදිය බව නිගමනය කළ අතර කෙලෙස රසදිය පරිසරයට එක්‌ වන්නේ ද යන්න බැලීම ඔවුන් ගේ ඊළඟ ඉලක්‌කය විය. මේ සදහා හේතු වන්නේ චිසෝ සමාගමෙන් කාලයක සිට බැහැර කරන අපද්‍රව්‍ය බව ද, එමගින් මිනමාටා මුහුදු බොක්‌ක වසර තිහක පමණ කාලයක සිට දූෂ්‍ය වී ඇති බව ද අනාවරණය විය.

පරිසරයේ රැෙදන රසදිය ජීවීන් ගේ ශරීර තුළට ඉතා පහසුවෙන් ඇතුළු වේ. ඒ ප්‍රධාන වශයෙන් ම ආහාර දාමය හරහා ය. ජෛව සංචයට ලක්‌ වන ලෝහයක්‌ වන රසදිය අවසානයේ දී

එක්‌රැස්‌ වන්නේ මිනිසා ගේ සිරුර තුළ ය. හානි කරන්නේ ප්‍රධාන වශයෙන් ම ස්‌නායු පද්ධතියට ය. සමායෝජනයේ අපහසුතාව, ඇස්‌ පෙනීමේ දුර්වලතා සහ අත්වල සහ පාවල ඉඳිකටු ඇනෙන්නාක්‌ මෙන් ඇති වන දැනීම් රසදිය විෂ වීමේ ලක්‌ෂණ වේ. "මෙතිල් මර්කරි" (Methyl Mucurry) නම් වූ රසායනිකය නිදහස්‌ කළ චිසෝ සමාගම හේතුවෙන් 2001 වන විට ජීවිත 1784ක්‌ බිලි වූ අතර මිනිසුන් 2265ක්‌ රෝගයට ගොදුරු විය. ඩොලර් මිලියන 86ක්‌ මිනිසුන් 10000ක්‌ අතර වන්දි ලෙස බෙදා දෙන්නට මේ සමාගමට සිදු වූ අතර එවැනි ම වූ විශාල මුදලක්‌ දූෂිත පරිසරය පිරිසිදු කිරීම සදහා වැය කිරීමට සිදු විය.

අමිහිරි මිනමාටා සිදුවීමේ මිහිරි අවසාන ප්‍රතිඵලය ලෙස 2013 ජනවාරි 19 දා ශ්‍රී ලංකාව ඇතුළු රටවල් 140ක්‌ එක්‌ ව රසදිය පරිසරයට එක්‌ නො කරන්නට එකඟ ව සම්මුතියකට අත්සන් කළ අතර එය "මිනමාටා සම්මුතිය" ලෙස හැඳින්වේ. මේ රටවල් අද වන විට රසදිය ජනනය කරන මානව ක්‍රියාකාරකම් නවතාලමින් විකල්ප සදහා යොමු වී තිබේ. එහෙත් තවමත් සමහර කටයුතු සහ කර්මාන්ත මානවයා ගේ දැඩි අවශ්‍යතාව මත ක්‍රියාත්මක වෙමින් තිබෙන බව නොරහසකි.

ඒ අතරින් ලොව රසදිය වායුගෝලයට නිදහස්‌ කිරීමට දායක වන ප්‍රධාන හේතුවක්‌ වන්නේ ගල් අඟුරු දහනයයි. ආසන්න වශයෙන් එය සියයට හැට පහක්‌ පමණ වන වේ. ස්‌වාභාවික පරිසරයේ (පාෂාණ තුළ) රසදිය හමු වන්නේ සිනබාර් (HgS) නම් වූ සල්ෆයිඩ ඛනිජයක්‌ ලෙස ය. ස්‌වාභාවික ජීර්ණය හේතුවෙන් රසදිය ඉතා සෙමෙන් පරිසරයට නිදහස්‌ වේ. ස්‌වාභාවික තත්ත්ව යටතේ දියරමය තත්ත්වයේ හමු වන ලොව එක ම ලෝහ වර්ගය වන්නේ ද රසදියයි. බොහෝ විට රත්රන් ලෝහය සමග එකට හමු වන ලෝහයක්‌ වන අතර එනිසා බොහොමයක්‌ රත්රන් පතල්වල දී ඉවත ලන පස්‌ සහ ගල් සමග මිශ්‍ර ව පරිසරයට නිදහස්‌ වේ. එය ප්‍රමාණිකව සියයට එකොළහක්‌ පමණ වේ. යකඩ නො වන ලෝහ වර්ග නිස්‌සාරණයේ දී ද, යකඩ නිස්‌සාරණයේ දී ද, සිමෙන්ති නිෂ්පාදනයේ දී ද, කෝස්‌ටික්‌ සෝඩා නිෂ්පාදනයේ දී ද පරිසරයට රසදිය නිදහස්‌ වන බව වාර්තා වේ. එපමණක්‌ නො ව රත්රන් කර්මාන්තයේ දී ද රසදිය භාවිත වන අතර එම කර්මාන්තයේ යෙදෙන්නන් පහසුවෙන් රසදිය විෂ වීමට ලක්‌ විය හැකි ය.

වර්තමානයේ ශ්‍රී ලංකාව තුළ රසදිය රත්රන් කර්මාන්තය සදහා භාවිත වන අතර අප භාවිත කරන ෆ්ලෝරසන්ට්‌ විදුලි බුබුළ තුළ ද රසදිය අඩංගු වේ. LED නිෂ්පාදන පැමිණි නිසා ඒවා භාවිතයෙන් ක්‍රමයෙන් ඉවත් වන මුත් තවමත් රට තුළ එම විදුලි බුබුළු සංසරණය වෙමින් පවතී. එනිසා තම ගෙවල, කාර්යාල හා කර්මාන්තශාලාවල එම බල්බ ඇත්නම් ඉතා පරීක්‌ෂාකාරී ව විධිමත් ව බැහැර කළ යුතු ව ඇත. උෂ්ණත්වමානවල ද රුධිර පීඩනමානවල ද රසදිය භාවිත වන බව අපි සැවොම දනිමු. එහෙත් අද වන විට ආජන්ටිනාව, ඔස්‌ටි්‍රයාව, පිලිපීනය, එංගලන්තය සහ ඇමෙරිකාව වැනි රටවල් සම්පූර්ණයෙන් ම මේවා භාවිතයෙන් ඉවත් වී ඇත. කෙසේ වෙතත් ශ්‍රී ලංකාව තවමත් සම්මුතියට අත්සන් කළ තැන ම ද යන්න සැලකිය යුතු කරුණකි.

ආචාර්ය පත්මකුමාර ජයසිංහ

විදු පත් ඉරුව
16.03.2016
ඉරුදින මුළු රටේ ම සිදු වූ විදුලිය ඇණහිටීම නිසා සැවොම අපහසුතාවට පත් වුණා. බොහොමයක්‌ අත්‍යවශ්‍ය කටයුතු සැලකිය යුතු ලෙස එයින් බලපෑමට ලක්‌ වුණා. මේ දිනවල පවතින අධික උණුසුමත් සමග මේ තත්ත්වය තවත් උත්සන්න වන බව අමුතුවෙන් කියන්න අවශ්‍ය නැහැ නේ.

හදිසි අවශ්‍යතාවක දී විදුලි සැපයුම යථා තත්ත්වයට පත් වන තෙක්‌ ඒ වෙනුවෙන් වූ විකල්පයක්‌ තවමත් අප රටේ නිර්මාණය වෙලා නැහැ. එක්‌ එක්‌ ආයතන සහ ඒක පුද්ගල පාරිභෝජනය සදහා කුඩා විදුලි ජනකයන් භාවිත කළත් සමස්‌තය සදහා එය වඩා හොඳ විකල්පයක්‌ වී නැහැ.

කෙසේ වෙතත් පෙනී යන කරුණ වන්නේ රටේ සමස්‌ත විදුලි සැපයුම් පද්ධතිය ම යාවත්කාලීන විය යුතු ව ඇති බවයි. නවීන තාක්‌ෂණික ක්‍රමවේදයන් භාවිත කළ යුතු මේ කටයුත්ත සදහා බලධාරීන් ගේ අවධානය කඩිනමින් යොමු කළ යුතු ව තිබෙනවා. එසේ නො වුණොත් මෙවැනි තත්ත්වයන්ට අපට දිගින් දිගට ම මුහුණු දීමට සිදු වේ වි.

ප්‍රාදේශීයව බල ගැන්විය හැකි මෙන්ම අවශ්‍ය විටෙක මධ්‍යම යාන්ත්‍රණයෙන් මිදී ප්‍රාදේශීයව විදුලිය සැපයිය හැකි ක්‍රමවේදයක්‌ හෝ යාන්ත්‍රණයක්‌ ස්‌ථාපිත කළ හැකි නම් මෙවැනි බිඳ වැටීම්වලට පහසුවෙන් මුහුණ දිය හැකි බව අප ගේ හැඟීමයි.

මේ වන විටත් රටේ බොහොමයක්‌ ජල මූලාශ්‍ර බලශක්‌ති ජනනය සදහා භාවිතයට ගෙන ඇති අතර එමගින් සපිරිය හැකි විදුලි අවශ්‍යතාවය සීමාසහිතයි. නුදුරු අනාගතයේ දිනෙක මූලික ශක්‌ති ප්‍රභවයන් විය යුතු නමුත් දැනට විකල්ප ක්‍රමවේදයන් වන සුනිත්‍ය බලශක්‌තීන් කෙරෙහි අවධානය යොමු වී ඇති මුත් එහි ද භාවිතයේ දී යම් යම් සීමාකාරී තත්ත්වයන් ඇති බව බලධාරීන් පවසනවා. වඩාත් ශක්‌තිමත් ව එවැනි ශක්‌තීන් භාවිත කිරීමට සුදුසු යාන්ත්‍රණයක්‌ බලගැන්විය යුතුයි. නැත හොත් සිදු වන්නේ ගල් අඟුරු සහ ඩීසල් වැනි භාවිතයන් සදහා රට දිගින් දිගට ම යොමු වීමයි. රටෙහි ආර්ථිකයට එය එතරම් සුබදායි තත්ත්වයක්‌ නො වේ. එමෙන් ම පාරිසරිකව ගත්තත් කොහෙත් ම හිතකර තත්ත්වයක්‌ නො වේ. හරිතාගාර ආචරණය සවිමත් කරන මෙවැනි බලාගාර එහෙයින් ලොවට වක්‍ර ව සිදු කරන්නේ බලවත් හානියක්‌. දැනටමත් ඔබ අප දන්නා පරිදි නොරොච්චෝලේ ගල් අඟුරු බලාගාරය ඉදි වන්නේ මෙරටෙහි ශක්‌ති අවශ්‍යතාවේ අඩුව සැපිරීමට වුවත් නිසි තාක්‌ෂණය සහ පිරිසිදු ගල් අඟුරු නො යෙදීම වැනි කරුණු විවිධ පාරිසරික ගැටලු ඇති කිරීමට හේතු වී තිබෙනවා. කෙසේ වෙතත් මෙවැනි ගල් අඟුරු බලාගාර කිහිපයක්‌ ම මෙරටෙහි ස්‌ථාපිත කිරීමට මේ වන විටත් යෝජනා කර ඇති බව සැළයි.

අප හොඳින් දන්නා පරිදි "සුපිරිසිදු ගල් අඟුරු" භාවිත නො කිරීම සල්ෆර් ඩයොක්‌සයිඩ් වැනි ආම්ලික වායුන් වායුගෝලයට මුක්‌ත කිරීමට හේතුවක්‌. එය වැඩි කල් නො ගොසින් ම අම්ල වැසි ඇති කිරීමටත් එනිසා ම ප්‍රබල ලෙස ජීවීන් ප්‍රමුඛ සමස්‌ත පරිසරයට ම හානි කරන්නටත් හේතු වනවා. විද්‍යාඥයන් ගේ පර්යේෂණ සහ සමීක්‌ෂණවලට අනුව ගල් අඟුරු භාවිතය ආම්ලික වායුන් පමණක්‌ නො ව රසදිය වැනි බැර ලෝහ ද පරිසරයට එකතු කිරීමට හේතු වන තවත් ප්‍රබල ක්‍රියාදාමයක්‌. මේ සදහා ප්‍රධානව හේතු වන්නේ ගල් අඟුරු බිහි වීමේ දී සාන්ද්‍රගත වන රසායනිකයන් දහනය සහ සංචිත වීමයි. ගල් අඟුරු බිහි වන්නේ මිහි මත කලක දී තිබූ වනාන්තර, අවසාදිත මගින් වැසී ගොස්‌ කාලයක්‌ ගත වන විට සිදු වන උෂ්ණත්ව පීඩන වෙනස්‌ වීම හේතුවෙන් ඇති වන රසායනික වෙනස්‌ වීමකින් .එහි දී ශාකවල වූ සමහර බැර ලෝහ සහ සල්ෆර් වැනි රසායනිකයන් ගල් අඟුරු තුළ එක්‌ රැස්‌ වනවා.

ආචාර්ය පත්මකුමාර ජයසිංහ

විදු පත් ඉරුව
09.03.2016

පසුගිය සතියේ අප කතා කළේ ලෝකයේ උතුර දකුණ මාරු වීම පිළිබඳව ය. මේ සතියේ කතා කරන්නට වන්නේ ශ්‍රී ලංකාවේ මිනිසුන්ට උතුර දකුණ මාරු වීම සම්බන්ධව ය. කුලියාපිටියේ දරුවාට තවමත් පාසලක්‌ ලැබී නොමැත. බටහිර වෛද්‍යවරු අදාළ රෝගය ගැන ඉතා හොඳින් දන්නා ඇත්තෝ වෙති. එනිසා ඔවුන් ගේ වදන් පිළිබඳව සැකයක්‌ ඇති කරගැනීමට අවශ්‍ය නො වේ. වසර ගණනාවක්‌ තිස්‌සේ මේ රෝගය පිළිබඳව ඔවුන් විවිධ පර්යේෂණ සිදු කර ඇත. රෝගය පැතිරෙන්නේ කවරාකාරයෙන් දැයි ඔවුන් ඉතා හොඳින් මේ වන විට පැහැදිලි කර ඇත. අපට පෙනී යන ආකාරයකට මේ කරුණු සමාජගත වීමේ දී කිසියම් අඩුපාඩුවක්‌ ඇති වී ඇති බව සිතේ. සම්පූර්ණ විස්‌තරය විධිමත් ව සමාජගත නො වී යම් කරුණු පමණක්‌ ජනතා සිත් සතන් තුළ පැළපදියම් වීමට හේතුව කුමක්‌ ද යන්න අප සොයා බැලිය යුතු ය.

පැහැදිලි සත්‍යයක්‌ ඇත. ඒ ජනතාව සමග ගනුදෙනු කිරීම පහසු නැති බවයි. විවිධාකාරයේ දැනුම් මට්‌ටම් ඇත්තන් විසීමත්, ඔවුන් දැනුම ග්‍රහණය කරගන්නේ විවිධ මට්‌ටම්වලින් වීමත් මේ සදහා ප්‍රධාන හේතුවකි. මෙලෙස ලබාගන්නා දැනුම තම මනෝභාවය තුළ හිඳිමින් ම විශ්ලේෂණය කරන්නට පෙලඹෙන ජනතාව කෙළවර නිගමනය කරන්නේ අප කිසිවකු බලාපොරොත්තු නො වූ ආකාරයට ය. වෛද්‍යවරුන් රෝගය ගැන ඉතා හොඳින් පැහැදිලි කළ පසු ද එය පිළිගැනීමට එම ජනතාව අපොහොසත් වීමෙන් මේ බව මැනැවින් පසක්‌ වෙයි. නැත හොත් අත්‍යන්තයෙන් ම පෙනී යන්නේ එය පෞද්ගලික පලිගැනීමක්‌ බවයි.

නිසි විද්‍යා අධ්‍යාපනයක වැදගත්කම මෙයින් මනාව පැහැදිලි වේ. අප ගේ සාක්‌ෂරතාව කෙතරම් හොඳ මට්‌ටමක තිබුණ ද ජනතාව වැදගත් කරුණු ග්‍රහණය කරගන්නේ කෙතරම් සුළු වශයෙන් දැයි අමතුවෙන් ඔබට පැහැදිලි කළ යුතු නො වේ. සති අග දී විවිධ විශේෂාංග සහිතව පුවත්පත් ගණනාවක්‌ නිකුත් වේ. සතියේ දිනවල ද පුවත් මවන මාධ්‍ය එමට ය. බොහෝ වාර ගණනක්‌ සුවසෙත, ලෙඩ රෝග ගැන කතා බහ කරන ලිපිවල ද, සාකච්ඡාවල ද අඩු පාඩුවක්‌ නොමැත. එහෙත් පෙනී යන කරුණු අනුව මේවා බලා, කියවා සිතට ධාරණය කරගන්නන් නොමැති බවක්‌ හැඟී යයි. සමර අය පුවත්පත් යොදාගන්නේ බත් ඔතන්නටත් අත පිහදාන්නටත් පමණක්‌ විය හැකි ය.

ජනතාවට වැදගත් වන කරුණු කාරණා පැහැදිලි කිරීමේ දී ද, ඉදිරිපත් කිරීමේ දී ද විවිධ ක්‍රමවේද භාවිත කළ හැකි ය. සිත් කාවදින ලෙස ඉදිරිපත් කිරීමට යම් හැකියාවක්‌ ඇති වැඩසටහන් නිෂ්පාදනය කිරීම ගැන මෙහි දී සැලකිය යුතු ය. එහෙත් ඒ එලෙස ම සිදු වේ ද යන්න ගැටලුවකි. එවැනි වැඩසටහන් නිර්මාණය වන්නේ ඉතා අඩුවෙනි. අතළොස්‌සක්‌ වූ එවැනි වැඩසටහන් සදහා විකාශන අවකාශය ද ඉතා අඩු ය. අද බොහෝ නාළිකා ප්‍රමුඛතා ලබා දී ඇත්තේ හරසුන් වැඩසටහන්වලට ය. එනිසා ජනතාව ද වැදගත් වන කිසිවක්‌ ග්‍රහණය කර නො ගනිමින් ඔහේ බලා සිටියි. දෙඇස පිනවන බව පමණක්‌ දනී. ඔළුවට වදිනා දෙයක්‌ නම් නොමැත.

මේ නාළිකා වෙළෙඳ දැන්වීම් සදහා නම් වැඩි කාලයක්‌ ලබා දෙනවා මෙන්ම ඒ අංශයේ නිර්මාණාත්මක බව ද ඉහළින් ම පවත්වාගනී. මේ දිනවල විකාශනය වන එක්‌තරා ක්‌ෂණික ආහාර දැන්වීමක්‌ පිළිබඳව අප ගේ අවධානය යොමු කළ හැකි ය. අප දන්නා පරිදි ස්‌වාභාවිකව ලබාගන්නා ආහාරවල ගුණාත්මකභාවය ඉහළ ය. එහි කිසි ම තර්කයක්‌ නැත. එමෙන් ම කෘත්‍රිම නිෂ්පාදනවල යොදාගන්න විවිධ රසායනික ද්‍රව්‍ය නිසා එම ආහාර ස්‌වාභාවික ආහාර හා ළඟින් වත් තැබිය නොහැකි ය. එහෙත් මේ දැන්වීමෙන් නිෂ්පාදකයන් නො කියා කියන්නේ ඔවුන් ගේ කෘත්‍රිම නිෂ්පාදනය මේ හැමට ම වඩා ඉහළ බවයි. යොදාගෙන ඇත්තේ ද කුඩා දරුවෙකි. මෙදෙස බලා ඉන්නා කුඩා දරුවන් ද එය අනුගමනය නො කරනු ඇතැයි කවරකුට කිව හැකි ද? එවිට මාපියන් ගේ පැහැදිලි කිරීම් පලක්‌ වේ ද යන්න ඔබට තේරුම්ගත හැකි ය.

එවැනි ම තවත් දැන්වීමක්‌ වෙයි. එක්‌තරා රසකාරකයක්‌ එක්‌ කර තම ආහාර රසවත් කරගත හැකි යන්න එහි දී කියා සිටි. එක ම එක රසයක්‌ සැම ආහාරයක්‌ සදහා ම සුදුසු බවයි ඒ සූපවේදිනිය කියා සිටින්නේ. ශ්‍රී ලාංකික අපි බොහෝ ආහාර වර්ග රස විදින්නෝ වෙමු. ඒ අපට ඉතා ඉහළ ආහාර විවිධත්වයක්‌ හිමි නිසාවෙනි. ඒ සියල්ල අත්හැර එක ම රසයකට යා යුතු ද? ඔබ මේ පිළිබඳව ඉතා සූක්‌ෂමව කල්පනා කළ යුතු ය. අනෙක්‌ කරුණ වන්නේ මේ රසකාරකය අප කවුරුත් හොඳින් දන්නා MSG නමින් හඳුන්වන රසායනිකය අඩංගු නිෂ්පාදනයක්‌ බව ය. මේ වන විට මේ රසායනිකයේ සෞඛ්‍යාරක්‌ෂිත බව සම්බන්ධයෙන් මතභේද පවතියි.

මෙවැනි ම වූ තවත් බොහෝ උදාහරණ ඇති බව රූපවාහිනිය බලන්නකු නම් ඔබට තේරුම් යනු ඇත. නො දැනී ම අප විනාශ කරගන්නේ අප ගේ බුද්ධිමත් ස්‌වයං තීරණ අයිතිය නො වේ ද? කිරා බලා නිසි දෙය තීරණය කිරීම යටපත් කොට මවාපාන බොරුව හොඳ බව තීරණය කරන්නට අප බොහෝ දෙනකු පෙලඹෙන්නේ නිතැතින් ම ය. මේ දැන්වීම් බොහොමයක බොරුව පින්තාරු කර ඇත්තේ විද්‍යාවෙනි. එනිසා ජනතාව ඉතා පහසුවෙන් අතරමං වන බව අමුතුවෙන් කිව යුතු නො වේ. මන්ද යත් ජනතාව නිසි ලෙස විද්‍යා දැනුම ග්‍රහණය කර නො ගන්නා බව මේ දැන්වීම් නිර්මාණකරුවන් ඉතා හොඳින් දන්නා බැවිනි.

විද්‍යා අධ්‍යාපනය නිසි පරිදි ව්‍යාප්ත කිරීම පමණක්‌ නො ව මෙවැනි හානිදායක, ජනතාව මුළා කරන වෙළෙඳ දැන්වීම් විකාශය කිරීම පිළිබඳව කිසියම් පාලනයක්‌ තිබීම අනිවාර්ය බව ඔබට වැටහෙනු ඇත. එනිසා මේ පිළිබඳ යම් සාකච්ඡා, දැනුවත් කිරීම් පමණක්‌ නො ව අවශ්‍ය නම් විරෝධතා ද පළ කළ හැකි ය. පාලකයන් ගේ අවධානය නම් මේ සම්බන්ධව යොමු වීම ඉතා අවශ්‍ය ය. වෙළෙඳ දැන්වීම් සම්බන්ධව ජනතාවට හිතකර ප්‍රතිපත්තියක්‌ ස්‌ථාපිත කිරීමට දැනටමත් අප ප්‍රමාද ය.

එමෙන් ම ජනතාව සැබැවින් ම ග්‍රහණය කරගත යුතු සෞඛ්‍ය පණිවිඩ, වෙළෙඳ දැන්වීම් තරම් ග්‍රහණය කර නො ගන්නේ මන්දැයි සොයා බලා ඊට ද පිළියම් යෙදිය යුතු ය.

ආචාර්ය පත්මකුමාර ජයසිංහ

"ස්‌වාභාවික විපත් නිසා මිය යන පිරිස එන්න එන්න ම වැඩි වන බවක්‌ පෙනෙන්නට තිබේ. ගංවතුර, නාය යැම්, භූ කම්පා ආදි බොහොමයක්‌ ස්‌වාභාවික විපත් ඇති වනුයේ භූ විද්‍යාත්මක සංසිද්ධීන් මුල් කරගනිමින් ය. දේශීය ව මෑතකාලීනව ගංවතුරෙන් හා නාය යැමෙන් ජනතාවට වූ පීඩා සුලබව අසන්නට දකින්නට ලැබිණ. කඩිනමින් ආහාරපාන, ආරක්‌ෂිත ස්‌ථාන ආදිය සපයමින් විපතට පත් වූවන්ට, අවතැන් වූවන්ට සහන සලසනු මෙවන් අවස්‌ථාවන්හි දී කෙතරම් දක්‌නට ලැබුණ ද පීඩිතයන්ගේ මානසික සංවර්ධනය උදෙසා යමක්‌ සිදු කරනු දක්‌නට නො ලැබෙන තරම් ය. කායික පීඩනයට වඩා මානසික පීඩනය බෙහෙවින් භයානක වන අතර ම අයකු මානසික ව ව්‍යාකූල වූ විට නො කරන දෙයක්‌ නොමැති තරම් ය.

සමාජ භූ විද්‍යාව නම් වූ සංකල්පය කරළියට පැමිණෙන්නේ මෙවන් වූ පසුබිමක ය."

                                                           -----------සිනේකා වීරක්‌කොඩි

http://vidusara.com/2018/09/19/feature3.html

විදු පත් ඉරුව
02.03.2018.
කෙනකුට "උතුර දකුණ" මාරු වන්නේ හොඳකට නම් නො වේ. එකවර මුළු ලෝකයට ම උතුර දකුණ මාරු වුව හොත් කුමක්‌ සිදු වේ ද? ඇත්තට ම ඔබ ඒ ගැන කුමක්‌ සිතන්නේ ද? ඒ ගැන ඔබ කුමක්‌ සිතුවත් එකවර මුළු ලෝකයට ම උතුර දකුණු මාරු විය හැකි වීම සත්‍යයක්‌ බව නම් මේ වන විට විද්‍යාඥයන් සොයාගෙන අවසන්. ඇත්තට ම මෙහි දී සදහන් කෙරෙන "උතුර දකුණ" වන්නේ චුම්බක උතුර දකුණ මිස වෙන කිසිවක්‌ නො වේ.

පවතින චුම්බක උතුර, දකුණ වී, පවතින චුම්බක දකුණ, උතුර වීම භූ විද්‍යා ලෝකය තුළ දී නම් අරුමයක්‌ නො වේ. එයට හේතුව වන්නේ අතීතයේ බොහෝ වාර ගණනක්‌ මේ පැති මාරුව සිදු වී ඇති බව වාර්තා වීමයි. භූ චුම්බක ක්‌ෂේත්‍රය මෙලෙස කණපිට පෙරළෙන්නේ මන්දැයි යන්න දැනගැනීමේ කුතුහලයක්‌ ඔබට මේ වන විටත් ඇති වී ඇති බව නිසැක ය. ඔබට මෙයට පෙර වතාවක දී පෘථිවියේ හරස්‌ කඩ කෙබඳු දැයි මා පහදා දී ඇත. රවුම් අලි පෙර ගෙඩියක අභ්‍යන්තර කොටස්‌ පෘථිවියේ ප්‍රධාන ස්‌ථරවලට බොහෝ සමාන වේ. පිටතින් ම ඇත්තේ කබොල වන අතර ඇතුළතින් ම ඇත්තේ හරයයි. ඒ දෙක අතර ප්‍රාවරණය පිහිටයි. හරය ඉතා බර ලෝහවලින් සමන්විත වන අතර යකඩ සහ නිකල් නම් ලෝහවලින් එය සමන්විත වන බව සොයාගෙන ඇත. හරයේ මුල් ප්‍රදේශය අර්ධ ඝන තත්ත්වයේ පවතින අතර අභ්‍යන්තරයට යත් ම ඝන බවට පත් වේ. එනිසා හරය යම් දුරකට ගතික බවකින් යුක්‌ත වේ.

ඔබ විද්‍යාගාරයේ දී විද්යුත් චුම්බක ක්‌ෂේත්‍රයක්‌ ඇති කරගත් ආකාරය සිහියට නගාගන්න. තඹ කම්බි, යකඩ කූරක්‌ වටා ඔතා දෙකෙළවරට විද්යුත් ධාරාවක්‌ ලබා දීමෙන් චුම්බක ක්‌ෂේත්‍රයක්‌ ඇති වන බව ද එය තඹ කම්බිය දෙසට ඇදී යන ඇණ හේතුවෙන් තහවුරු වන බව ද ඔබ අත්දැක ඇත. හරය අභ්‍යන්තරයේ ද මෙවැනි ම ක්‍රියාවලියක්‌ සිදු වේ. ගතික හරයේ පවතින ද්‍රව යකඩ "ඩයිනමෝවක්‌" කැරකෙන ලෙස සංසරණය වීම නිසා විද්යුත් ධාරාවන් හටගන්නා අතර, එනිසා ම විද්යුත් චුම්බක ක්‌ෂේත්‍රයක්‌ හටගනී. අර්ධ ඝන ද්‍රව්‍යයේ සංසරණ රටාව වෙනස්‌ වීම උතුර දකුණ මාරු වීමට ප්‍රධාන ම හේතුව වේ.

භූ චුම්බක ප්‍රතිවර්තනය පිළිබඳව මුල්වරට අධ්‍යයන කටයුතු සිදු කර ඇත්තේ විසිවැනි ශතවර්ෂයේ මුල් භාගයේ වන අතර එහි දී ඔවුන් ආග්නේය පාෂාණ තැන්පත් වී ඇති රටාවෙහි ප්‍රතිවිරුද්ධතාවක්‌ නිරීක්‌ෂණය කර ඇත. විශේෂයෙන් ම සාගර පතුල විස්‌තාරණය වන ප්‍රදේශවල භූ අභ්‍යන්තරයෙන් ගෙන එන ද්‍රව මැග්මා ඝනීභවනය වී තැන්පත් වන්නේ තත්කාලයේ පවතින භු චුම්බක රටාවට අනුව ය. එනිසා මධ්‍ය සාගරික කඳු වැටියේ දෙපසින් තැන්පත් වන සෑම මැග්මා (ලාවා) පෙදියක්‌ ම පවතින රටාව අනුගමනය කරයි. ප්‍රතිවර්තනය වන විට ද එම ප්‍රතිවර්තනය එනිසා ඉතා කදිමට මේ පාෂාණවල සටහන් වේ. එවිට ප්‍රතිවිරුද්ධ දිශානතීන්ට තැන්පත් වූ පාෂාණ පොදි ඇති වේ. මෙවැනි ක්‍රියාවලියක්‌ මුලින් ම කාලනිර්ණයකට භාජන කරන ලද්දේ 1920 "මොන්ටෝරි මතුයාම" නැමති විද්‍යාඥයා විසිනි. මහාද්වීප ප්ලාවිතයත් සමග සබැදුණ මේ පර්යේෂණ හේතුවෙන් 1950 පමණ වන විට භූ චුම්බක ප්‍රතිවර්තනය යන්න හොඳින් පැහැදිලි කරගෙන තිබිණි.

සාමන්‍ය චුම්බක ක්‌ෂේත්‍රයේ දිශානතිය පවතින කාලය සහ ප්‍රතිවර්තනය වී කණපිට පෙරළුණු කාලය ද අතර පරතරය වසර මිලියන 0.1 සිට 1 පමණ දක්‌වා කාලයක්‌ වන බව මේ වන විට සොයාගෙන ඇත. ඒ අනුව සාමන්‍යය වන්නේ වසර 450,000 පමණ ය. බොහොමයක්‌ ප්‍රතිවර්තන පැවැති කාල සීමාව වසර 1000ක්‌ 10000ක්‌ පමණ වේ. මැතක දී සිදු වූ ප්‍රතිවර්තනය සිදු වී ඇත්තේ මෙයින් වසර 41000කට පමණ පෙර අන්තිම ග්ලැසියර යුගයේ දී ය. එම ප්‍රතිවර්තනය වසර 440ක්‌ පමණ තිබූ බව ගණනය කර ඇත. සමහර ප්‍රතිවර්තන ඉතා කුඩා කාලයකට සීමා වී ඇති බව ද මේ වන විට තහවුරු වී ඇත. "බ්රරන්චස්‌-මතුයාමා" නම් භූ චුම්බක ප්‍රතිවර්තනය මෙයට වසර 780000කට පමණ පෙර සිදු වී ඇත.

භූ චුම්බක ප්‍රතිවර්තනය කෙලෙස ජීවී ගෝලයට බලපාන්නේ ද යන්න අධ්‍යයනය ඉතා ම වැදගත් ය. තවමත් නිශ්චිතව තහවුරු නො වුවත් ජීවීන් සමූහ ලෙස වඳ වී යැමට මෙය හේතු වන බවට මතයක්‌ පවතී. ප්‍රතිවර්තනය සිදු වන කාල සීමාවේ දී චුම්බක ක්‌ෂේත්‍රයේ බලය හීන වන බවට ද මතයක්‌ පවතින අතර එනිසා වායුගෝලය තුළ අහිතකර කිරණවල බලපෑම වැඩි වන බවට විශ්වාස කෙරෙයි. එය කිසියම් ආකාරයකට ජාන විකෘත කරන්නට හේතු වන බවත් එනිසා නව විශේෂ බිහි කිරීමට හේතු වන බවත් විශ්වාස කෙරෙයි. කෙසේ වෙතත් විද්‍යාඥයන් පවසන ආකාරයට මේ ප්‍රතිවර්තනය සුවිශේෂී ක්‌ෂණික වෙනස්‌කම්වලට හේතු නො වන බව පෙනී යයි.

වර්තමානයේ චුම්බක උතුර පිහිටන්නේ ලෝකයේ ආර්ක්‌ටික්‌ ප්‍රදේශයට ද, දකුණ පිහිටන්නේ ඇන්ටාර්ක්‌ටික්‌ ප්‍රදේශයට ද දිශානුගතව ය. සත්‍ය උතුර හා අංශක 6ක පමණ වෙනසක්‌ දක්‌ෂිණාවෘත ව ඇති අතර අප භාවිත කරන මාලිමාවේ සටහන් වන්නේ චුම්බක උතුර බව මතක තබාගත යුතු අතිශය වැදගත් කරුණකි.

ආචාර්ය පත්මකුමාර ජයසිංහ

විදු පත් ඉරුව
24.02.2016
කුඩා කාලයේ අපි "හීන් සැරය" කියවා ඇත්තෙමු. අලින් ගැනත්, අලින්ට වන අකරතැබ්බ ගැනත් එයින් දැනගත්තෙමු. දැවැන්තයකු වුවත් කුඩා කටුස්‌සා ඉදිරියේ කෙතරම් අසරණ වන්නේ ද යන්නත්, ඇඟපතේ ශක්‌තියට වඩා මොළයේ ශක්‌තිය කෙතරම් ප්‍රබල ද යන්නත් අපි ඉන් ඉගෙනගත්තෙමු. කෙසේ වෙතත් හීන් සැරය කුඩා ළමයින්ට වන පරිසරය ගැනඉගෙන ගැනීමට ද උපකාරී වන ඉතා කදිම කතාන්දරයකි. හීන් සැරයේ විස්‌තර කෙරෙන්නේ අලින් ගේ කෙරුවාව ය. මෙවර විදුපත් ඉරුවෙන් කියන්නට යන්නේ ද අලින් ගේ ඉතා සුවිශේෂී කෙරුවාවක්‌ ගැන ය.

අලියෝ පස්‌ කති. ලංකාවේ අලින්ට ද මේ කතාව අදාළ ය. උඩවලවේ වෙසෙන අලි මේ සදහා රුසියෝ වෙති. දශක දෙකක පමණ කාලයක සිට මෙරට පර්යේෂකයෝ මේ පිළිබඳව උනන්දුවෙන් පසු වෙති.

නිරීක්‌ෂණවලින් වාර්තා වන්නේ අලින් මේ සදහා තම අඩවියේ සුවිශේෂී ස්‌ථාන තෝරාගෙන ඇති බවයි. තෙතමනය සහිත ස්‌ථාන ඒ අතර සුවිශේෂී වේ. තම පාදයෙන් ඇන පස්‌ කඩා හොඬයෙන් ගුලි කර තම මුව තුළට ඉතා කදිමට ඔබාගනී. අලින් ලිංග භේදයකින් තොර ව මේ කාරියේ යෙදෙන බව ය වාර්තා වන්නේ.

අලි ලුණු කෑමට ඉතා ප්‍රිය කරතිs. ඔවුහු ස්‌වාභාවිකව ලුණු පවතින ස්‌ථාන සොයාගෙන යති. මුහුදු වෙරළට යා නොහැක්‌කෝ ගොඩබිම ඇති ස්‌වාභාවික ලුණු නිධි සොයාගනිති. ලංකාවේ නො පැවතුණ ද පාෂාණිභූත වූ ලුණු නිධි ලෝකයේ සමහර රටවල හමු වේ. එයට අමතරව ද්විතීයික ක්‍රියාකාරිත්වයන්වලින් පැනනගින ලුණු ද පවතී. කෙන්යාවේ "කිතුම්" නම් විශාල ගල් ගුහාවක්‌ වෙයි. එය මීටර 200ක්‌ පමණ දිගු වන අතර උගන්ඩාව ආසන්නයට ම විහිද යයි. නිර්මාණය වී ඇත්තේ ගිනිකඳුවලින් ගලා ගිය ලාවා සිසිලනයෙනි. මෙය විද්‍යාඥයෝ ලාවා ගලා ගිය බටයක්‌ ලෙස ද හඳුන්වති. කෙන්යාවේ අලින් ලුණු හාරන්නට යන්නේ මේ ගල් ගුහාවට ය. මේ ගුහාවේ බිත්ති ලුණුවලින් පිරි පවතී. එහි යන අලි හොඩයෙන් ද දළවලින් ද ගසා ලුණු කුට්‌ටි කඩා ගනිsති. ඉතා අතීතයේ සිට මේ ක්‍රියාකාරිත්වය සිදු වන නිසා මේ ගුහාව විශාල වන්නට ද එය හේතුවක්‌ වන්නට ඇතැයි මතයක්‌ පවතී.

ලුණු කන අප්‍රිකානු අලින් ඒ සදහා අවස්‌ථාව සොයාගන්නේ ගුහාවලින් පමණක්‌ නො වේ. තමන් වෙසෙන අඩවියේ සුදුසු තැන තෝරාගැනීමට ඔවුහු දක්‌ෂයෝ ය. ලුණු වැනි ඛනිජවලින් අනූන පස්‌ ඇති තැන් ඔවුනට ගෝචර වෙයි.

අලින් ලුණු කන්නේ ඇයි? විද්‍යාඥයන් පවසන ආකාරයට ඒ ඔවුන් ගේ ඛනිජ අවශ්‍යතාව සපුරාගැනීමට ය. ඛනිජ අවශ්‍යතාව පැනනගින කල්හි ඔවුන් ස්‌වාභාවිකව ම ඒවා පවතින ස්‌ථාන කරා යොමු කරවන බව පෙනී යයි. එමෙන් ම තමනට අවශ්‍ය වන ඛනිජ පවතින ස්‌ථාන සොයාගැනීමේ සහජ හැකියාව මෙහි දී ඔවුනට ඉතා උපකාරී වන බව පෙනී යයි. ලුණු යනු සෝඩියම් ක්‌ලෝරයිඩ් නම් රසායනිකය බව ඔබ හොඳින් දනී. ලුණු මගින් ලබාගන්නේ "සෝඩියම්" බව ඔබට වැටහෙනු ඇත. එහෙත් එයට අමතර පොටෑසියම්, කැල්සියම්, මැග්නීසියම්, පොස්‌පරස්‌, මැන්ගනිස්‌ වැනි ඛනිජ ලවණ පමණක්‌ නො ව සෙලිනියම් වැනි දුලබ ඛනිජ ලවණ ද මේ ඔස්‌සේ ඔවුන් ලබාගන්නා බව පර්යේෂකයෝ පවසති. සමහර පර්යේෂකයන් පෙන්වා දෙන්නේ ගර්භණී ඇතින්නන් හට මේ ඛනිජ ලවණ අවශ්‍යතාව තදින් දැනෙන නිසා ඔවුන් වැඩිපුර මේ සදහා යොමු වන බවයි. කෙසේ වෙතත් මේ සදහා ඔවුන් පෙලඹෙන්නේ දෛනිකව ඔවුන් ලබාගන්නා ශාක ආහාර මගින් තම ඛනිජ ලවණ අවශ්‍යතාව සැපිරෙන්නේ නොමැති නිසා ය.

ලංකාවේ උඩවලව ප්‍රදේශයේ මට සංචාරය කරන්නට අවස්‌ථාවක්‌ ලැබුණු විටක අලින් පස්‌ කන ස්‌ථාන නිරීක්‌ෂණය කරන්නට අවස්‌ථාවක්‌ උදා විය. සමහර පර්යේෂකයන් පවසන ආකාරයට මෙහි අලින් පස්‌ බුදින්නේ ලවණ අවශ්‍යතාව සපුරාගැනීමට නම් නො වේ. ඒ විවිධ කොළ වර්ග, පොතු වර්ග ආහාරයට ගැනීමෙන් පසුව ආමාශයේ ඇති වන ජීර්ණ සංකුලතා සමනය කරගැනීමට බව ඔවුන් ගේ අදහස ය. ඔවුන් ගේ පර්යේෂණවලට අනුව පසෙහි එතරම් සැලකිය යුතු ලෙසකින් ඛනිජ ලවණ (salts) සාන්ද්‍රගත වීමක්‌ දක්‌නට නොමැති බව පෙනී යයි. එහෙත් මා ගේ නිරීක්‌ෂණවලට අනුව අලින් පස්‌ කන ස්‌ථානවල "ඛනිජ වර්ග (Minerals)" විශ්ලේෂණය කළ විට පෙනී ගියේ බොහොමයක්‌ ස්‌ථානවල ෙµල්ඩ්ස්‌පර් නම් ඛනිජය බහුල බවයි. මේ බොහොමයක්‌ ඛනිජ ස්‌ඵටික අර්ධ ජීර්ණයට ලක්‌ වූ ඒවා වන අතර ඒවායේ කැල්සියම් ලවණ බහුල ය. එම නිසා අප ගේ අදහස වන්නේ කැල්සියම් ලවණය වෙනුවෙන් මොවුන් පස්‌ බුදින බවයි. කෙසේ වෙතත් ඒ ආශ්‍රිත වෙනත් ලවණ ද ලබාගන්නවා විය හැකි ය.

හොඳින් නිරීක්‌ෂණය කළේa නම් යමකුට අලින් පමණක්‌ නො ව වෙනත් බොහොමයක්‌ වන සතුන් මේ ස්‌ථානවලට පැමිණ මෙලෙස පස්‌ බුදින බව දැක බලාගත හැකි ය. ඒ අතර මුවන්, ගෝනුන් වැනි සතුන් පමණක්‌ නො ව ගිරවුන් වැනි පක්‌ෂීන් ද වන බව වාර්තා වී ඇත. එයින් නිගමනය වන එක කරුණක්‌ නම් මේ ප්‍රදේශයේ සතුන්ට කිසියම් ආකාරයකට තමන් ලබාගන්නා ආහාරයෙන් කිසියම් ඛනිජයක්‌ නිසි පරිදි නො ලැබෙන බවයි.

මෙවැනි ආකාරයට ඛනිජ ලවණ අවශ්‍යතාව සපුරාගන්නේ සතුන් පමණක්‌ නො වේ. පැරැණි මිනිසුන් ද මෙවැනි ම ලෙස ඒ සදහා පස්‌ ආහාරයට ගත් බවට වාර්තා ඇත. මීට අදාළ පැරැණි ම වාර්තා හමු වන්aනේ අප්‍රිකාවෙනි. සැම්බියාව සහ ටැන්සානියාව අතර වූ ප්‍රාග් ඓතිහාසික පුරාවිද්‍යා කැණීමකින් තහවුරු වී ඇත්තේ එකල වූ හෝමෝ හැබිලිස්‌ නම් මානවයා කැල්සියම් අධික මැටි අනුභව කර ඇති බවයි. කාර්මීකරණයට පෙර බොහෝ රටවල මේ පුරුද්ද පැවැති අතර විශේෂයෙන් ම ගර්භණී කාන්තාවන් අතර බහුලව තිබූ සිරිතක්‌ බව සදහන් වෙයි. වර්තමානයේ නම් මිනිසුන්ට එවැනි අවශ්‍යතාවක්‌ පැන නො නගින්නේ හිඟ වන විට ලබාගැනීමට ඕනෑ තරම් විටමින් සහ ඛනිජ ඖෂධහල්වල පවතින බැවිනි.

ආචාර්ය පත්මකුමාර ජයසිංහ

විදු පත් ඉරුව
10.02.2016
හන්තාන අඩවිය පිස එන සුළඟ කිසි දිනක අමතක කළ නොහැක්‌කේ මා ගේ දෙවැනි කඩඉම සාක්‌ෂාත් කර දුන් පරිසරය එය බැවිනි. එපමණට ම මට හන්තාන අඩවිය ළබැඳි ය. විද්‍යාවේ ගැඹුරට කිමිදෙන්නට හන්තාන අඩවිය අපූරු පරිසරයක්‌ සකස්‌ කර දුන්නා ය. පළමු වසරේ සිට අවසාන වසර තෙක්‌ ම හන්තානේ නොයෙක්‌ තැන්වල කරක්‌ගසන්නට මා හට අවස්‌ථාව උදා විය. නැත හොත් අවස්‌ථාව මම ම උදා කරගත්තෙමි. ඒ කරුණු කිහිපයක්‌ නිසාවෙනි. පළමුවැන්න මා භූ විද්‍යාව හදාරන ශිෂ්‍යයකු වීමයි. දෙවැන්න මට විශ්ව විද්‍යාලය තුළ වූ ප්‍රමුඛ පෙළේ සමිති සමාගම් කිහිපයක ම ක්‍රියාකාරී සාමාජිකයකු වන්නට ලැබීමයි. තෙවැන්න මේ කිසිවක්‌ නොමැති කල කණ්‌ඩායම් සගයකු සමග කොහේ හෝ ඇවිදින්නට යැමයි.

තෙවැන්න බොහෝ විට සිදු වන්නේ නිවාඩු කාලයේ දී හෝ නිවාඩු දිනවල දී ය. සතිපතා ගෙදර දිවීමට වුqවමනාවක්‌ එකල මට නො වී ය. එමෙන් ම ඉතා දුර බැවින් සතිපතා ගමේ යැමට නොහැකි සගයන් කිහිප දෙනකු ද බොහෝ වේලාවට සති අන්තයේ නැවතිණි. විශ්ව විද්‍යාලයයේ නේවාසිකාගාර නිස්‌කලංකව පසු වෙයි. හවස්‌ වන විට කුමක්‌ දෝ පාළුවක්‌ අප වෙලාගනී. ඔන්න එවිට කාමරයෙන් පැන යැමට සිත් පහළ වෙයි. "යමු ද ඇවිදින්න" ඒ කනට මිහිරි වචන පෙළ අනෙකා ගෙන් පනින තුරු අප බලා සිටියා සේ ය. විශ්ව විද්‍යාලයයේ සිට හන්තාන කඳුකරය දෙසට විහිද යන පාරවල අපි සහෘදයන් සේ ඇවිද යන්නෙමු. විද්‍යාවේ ගැඹුරු තැන් ද, විද්‍යාඥයන් ගැන ද, පරිසරය ගැන ද, පුවත්පත්වල පළ වන වාද විවාද ගැන ද, දේශපාලනය ගැන ද පමණක්‌ නො වේ, ආචාර්යවරුන් සහ කණ්‌ඩායම් සගයන් ගැන ද අප ගේ නො නවතින කතා බහ ගලා යයි. විටෙක මේ නිස්‌කලංක ඇවිදීම නිසා ඉගෙනගත් කරුණු යළි සිහි කරන්නට පරිසරය තුළින් ම අවස්‌ථාව උදා විය. භූ විද්‍යාවේ උගත් ඛනිජ සහ පාෂාණ පිළිබඳ කරුණු ප්‍රායෝගිකව අත්විදින්නට මෙනිසා අපට අවස්‌ථාව ලැබිණි. වසර අවසාන විභාගය සදහා අප සූදානම් වූයේ ඒ සදහා ඉතා කෙටි කලක්‌ තබා ය. එහෙත් පෙර සිට ම විභාග භීතිකාවෙන් පෙළෙමින් බිය වී උන් අය අපහසුතාවට පත් කරමින් විටෙක අපි කිහිප දෙනා නිස්‌කලංකයේ ඇවිදින්නට යන්නෙමු. එය ඉතා වටිනා උපකාරයක්‌ වූයේ අප ගේ මානසික ආතතිය අඩු කරන්නට එය බෙහෙවින් හේතු වූ බැවිනි.

මෙයට පෙර වතාවක දී ද මා සදහන් කළ පරිදි සමිති අතර "හන්තාන සංරක්‌ෂණ සංගමය" මා හට බොහෝ අත්දැකීම් ලබා දුනි. 1998 වසරේ දී පිහිටුවූ මේ සංගමය විශ්වවිද්‍යාලයයේ බොහොමයක්‌ පීඨ නියෝජනය කරමින් ශිෂ්‍යයන් මෙන්ම ආචාර්යවරුන් ද සහයෝගය ලබා දුන් සංගමයක්‌ විය. එකල මේ සංගමය කමිටු ගණනාවකින් සමන්විත විය. ඒ අතර මා සිත්ගත් එක්‌ කමිටුවක්‌ වූයේ "ගිනි ගැනීම් මර්දනය කිරීමේ" කමිටුවයි. බොහෝ විට වියළි කාලගුණය ඇති කාලවල දී හන්තාන කඳුකරය ගිනිගැනීම්වලට ලක්‌ වේ. මේවා ස්‌වාභාවික ලැව් ගිනි නො වූ අතර මිනිසුන් ගේ යම් යම් ක්‍රියාකලාපයන් නිසා ඇති වන ගිනි ගැනීම් වේ. මෙය වළක්‌වාගැනීමේ පියවරක්‌ ලෙස හන්තාන අවට ග්‍රාමයන්හි වෙසෙන ජනතාව දැනුවත් කිරීමේ වැඩපිළිවෙළක්‌ දියත් කරන ලදි. "රාත්‍රි කඳවුරු" ලෙස හැඳින්වූ මේ ක්‍රියාකාරකමට සහභාගී වන්නට මම බොහෝ කැමැත්තක්‌ දැක්‌වූයෙමි. එහි දී සිදු වූ ප්‍රධාන කෘත්‍යය වූයේ අදාළ ගමෙහි ජනතාව රැස්‌ කර පරිසර සංරක්‌ෂණයේ වැදගත්කම ගැන ඔවුනට පහදා දීමයි. ගිනිගැනීම නිසා පරිසරයට සිදු වන හානිය පහදා දීමයි. මෙහි දී පරිසර සංරක්‌ෂණය අරමුණු කරගත් නාට්‍ය ද කිහිපයක්‌ ද රඟදක්‌වන ලද අතර නළු නිළියන් වන්නේ ද සංගමයේ සාමාජිකයන් ම ය. ඉතා අගනා ලෙස ගම්මුන් හට පණිවිඩය දෙන්නට අප සමත් වන්නේ ය. අපත් සමග විශ්වවිද්‍යාලයීය ආචාර්යවරයකු ද සහභාගි වන නිසා එතුමා ගේ දෙසුමක්‌ ද මේ රාත්‍රී කඳවුරේ අනිවාර්ය අංගයක්‌ වේ. රාත්‍රී ආහාරය බොහෝ විට පොලුත් සමග තැම්බූ කොස්‌ හෝ මඤ්ෙÆක්‌කා වෙයි. මහන්සි වී ද නේවාසිකාගාර බොජුන්හල්වල ඒකාකාරී ආහාරවලින් හෙම්බත් වී ද සිටින අපට ඒවා නම් දිව බොජුන් ය. මෙවැනි ක්‍රියාකාරකම් සදහා අනිවාර්යයෙන් ම සහභාගි වන්නා වූ දෙදෙනෙක්‌ වෙති. ඒ හේරත් මහත්ම මහත්මීන් දෙපළයි. අප ගේ කණ්‌ඩායම් සගයකු වන නිලන්ත ගේ මවුපියන් වන මොවුන් දෙදෙනා ගෙන් අපට ලැබුණු සහයෝගය ද ගුරුහරුකම් ද බොහෝ ය. මා අද ද ඔවුන් දෙපල සිහි කරන්නේ හද පිරි සතුටෙනි.

හන්තානේ ගිනිගැනීම් වැළැක්‌වීම සදහා හන්තාන සංරක්‌ෂණ සංගමය එකල ඉතා අගනා වටිනා සහයෝගයක්‌ ලබා දුන්නා ය. ඉහත සදහන් කළ දැනුවත් කිරීමේ රාත්‍රී කඳවුරුවලට අමතරව එම කමිටුවේ සාමාජිකයෝ ප්‍රායෝගිකව ද එම වගකීම ක්‍රියාවට නැංවූ හ. ගිනිගැනීමක්‌ පිළිබඳව ආරංචියක්‌ ලද වහා ම කමිටුවේ සංගමයේ සාමාජිකයන් රැස්‌ කර ගින්න නිවන්නට ද අපි උත්සුක වූයෙමු. එහි දී විශ්වවිද්‍යාලයයේ ආරක්‌ෂක අංශය ද දැනුවත් කරන්නට අප වැඩපිළිවෙළක්‌ සකස්‌ කර තිබිණි. පසු කාලීනව ආරක්‌ෂක අංශය වෙත යන අප සාමාජිකයන් දුටු සැණින් ඔවුහු බොහෝ විට ඒ බව කලින් ම නිශ්චය කර ගනිති. කෙසේ වෙතත් මෙවැනි වැඩ කටයුතු නිසා ආරක්‌ෂක අංශය පමණක්‌ නො ව විශ්ව විද්‍යාලයයේ "භූ දර්ශන නඩත්තු අංශය" ද අපට ඉතා සමීප විය. හන්තානේ ගිනිගැනීම් ඇති වන්නේ බොහෝ විට රාත්‍රී කාලයේ දී ය. රාත්‍රියේ දී වුව යාමය නිශ්චිත නො වී ය. එනිසා ක්‍රියාත්මක වීම කොයි මොහොතේ හෝ සිදු වෙයි. එකල අපට ගිනි නිවීම් සදහා ක්‍රමවත් උපකරණ නො වී ය. එහෙත් කෙසේ හෝ කාර්යය නිම කිරීමට අපි සමත් වූයෙමු. ආපසු නේවාසිකාගාරයට එන විට අපි හැමෝ ම කළු පැහැ ගැන්වී සිටියෙමු. වරක මද්දහනේ හන්තාන කඳු පන්තියේ හතරවැනි ශීර්ෂයේ ගින්නක්‌ ඇති වී තිබෙනු දුටුවෙමු. ඉතා හදිසියේ වුව අප ගේ තීරණය වූයේ කෙසේ හෝ එහි ළඟා වී ගින්න නිවිය යුතු බවයි. වෙනදාට පැය තුන හතරක කාලය ගන්නා ගමන පැයක දී නිම කරන්නට සමත් වූ අපි ගින්න ඇති වූ ස්‌ථානයට ළඟා වූයෙමු. සිටියේ අප හතර දෙනකු පමණි. වහා ම ක්‍රියාත්මක වූ අපි පැය කිහිපයක්‌ මහන්සි වී ගින්න නිවා දැමුවෙමුq. නැවත විශ්වවිද්‍යාලය වෙත එන විට හවස හය පසු වී තිබිණි. මෙවැනි දේ මගින් අපි වින්දනයක්‌ ලැබුවෙමු. ජීවිතයට අත්දැකීම් එක්‌ කරගත්තෙමු. වර්තමානයේ මෙවැනි දේ සදහා විශ්වවිද්‍යාලයයේ ශිෂ්‍යයන් හට ඉස්‌පාසුවක්‌ වේ ද යන්න මෙන්ම කාලය තිබුණ ද ඒ සදහා උනන්දුවක්‌ ඇත් ද යන්න ගැටලුවකි.

ආචාර්ය පත්මකුමාර ජයසිංහ

විදු පත් ඉරුව
03.02.2017
පසුගිය දොහක මට නෝර්වේ රටේ සංචාරයක නිරත වන්න අවස්‌ථාව ලැබුණා. දීර්ඝ ගුවන් ගමනකින් පස්‌සේ ඒ රටට පා තබන අවස්‌ථාවෙ සීත කාලය පටන් අරගෙනයි තිබුණේ. ඒ නිසා දසත විසිරිලා තිබුණේ සුදු ම සුදු හිම. සුළු මොහොතකින් සීතල අපව වෙළාගත්තේ එහි දැඩි දරුණු බව කියාපාමින්. උෂ්ණත්වමානය පෙන්නුම් කළේa සෙල්සියස්‌ අංශක Rණ හයක්‌ (-6) බවයි. ධන තිහක (+30) විතර උෂ්ණත්වයක ජීවත් වෙච්ච අපට ඒ උෂ්ණත්ව වෙනස දරාගන්න බැරි වේ වි කියලා මුල දී හිතුණත් අප හොඳින් සීතලට ලකලැහැස්‌ති වෙලා ගිය නිසා ඒ තරම් ගැටලුවක්‌ වුණේ නැහැ.

නෝර්වේ රාජධානියක්‌ ලෙසයි හඳුන්වන්නේ. එය විශාල රටක්‌. ශ්‍රී ලංකාව වගේ හයගුණයක්‌ පමණ විශාලයි. යුරෝපා මහාද්වීපයේ උතුරෙන් පිහිටි මේ රට නිරිත ඊසාන දිශානුගත ව විහිදී ගිය ඒ වගේ ම බටහිර පැත්තේ ඉතා දිගු වෙරළ තීරයක්‌ සහිත රටක්‌. ඒ වාගේ ම මේ රටේ බොහොමයක්‌ ප්‍රදේශ කඳුකර භූමිවලින් යුක්‌ත වන අතර ප්‍රාග් ඵෙතිහාසික යුගයේ නිර්මාණය වූ ග්ලැසියර තැන්පතුවලින් තැනුණු භූ රූපණවලින් සමන්විතයි. මෙහි පවතින බොහොමයක්‌ ගැඹුරු නිම්න අයිස්‌ යුගය අවසානයේ දී දිය වන හිම හේතුවෙන් සිදු වූ ඛාදනයෙන් ඇති වූ ඒවායි. එපමණක්‌ නො වේ, ලෝකයේ වැඩි ම දූපත් සංඛ්‍යාවක්‌ හිමි රට ලෙස ද එය හැඳින්වෙනවා. නෝර්වේ සතු දූපත් ගණන 50,000කට වැඩි බවයි වාර්තා වන්නේ. හැබැයි මෙපමණ විශාල රටක ජනගහනය නම් මිලියන 5කට ටිකක්‌ වැඩියි.

භූ විද්‍යාත්මකව ගත් කල බොහොමයක්‌ ප්‍රදේශ සමන්විත වන්නේ ප්‍රාග් කේම්බී්‍රය යුගයේ නිර්මාණය වූ විපරීත පාෂාණවලින්. ඒ වාගේ ම ග්‍රැනිට්‌ වර්ග, ස්‌ලේට්‌, වැලිගල් සහ හුණුගල් වැනි අවසාදිත පාෂාණ ද හමු වනවා. බොහොමයක්‌ ප්‍රදේශ කඳුකරයෙන් සමන්විත නිසා ඉතා හොඳ ජලවහන රටාවක්‌ මේ රටට හිමියි. එනිසා ම ඉතා කදිමට ක්‍රියාත්මක වන ජලවිදුලි බලාගාර රැසකින් ඉතා අපූරුවට විදුලිය උත්පාදනය කරනවා. ඊට අමතරව සුළං බලයත් යොදාගන්නවා. නෝර්වේ රාජධානියේ ශක්‌ති අවශ්‍යතාවෙන් 96%ක්‌ ම සපුරාගන්නේ සුනිත්‍ය බලශක්‌තියෙන්. ඒක හින්දා කොච්චර බොරතෙල් තිබුණත් ඒවා භාවිත කරන්නේ හරි ම අඩුවෙන්. ඔවුන් පවසන ආකාරයට තවත් බොහෝ විදුලි ශක්‌ති ප්‍රමාණයක්‌ ජලසම්පත භාවිත කරලා ලබා ගන්න පුළුවන්.

මේ රටේ එක්‌ ප්‍රධාන අපනයනයක්‌ වන්නේ බොරතෙල් සහ ස්‌වාභාවික වායුන්. ඔවුන් ගේ අපනයනයෙන් 50%ක්‌ ම එමගින් තමයි සපුරාගන්නේ. බොරතෙල් අපනයනයෙන් ලෝකයේ පස්‌වැනි තැන ඔවුනට හිමි වනවා. ඒ වාගේ ම ඛනිජ සම්පත්. විශේෂයෙන් ම විවිධ ලෝහ වර්ග ඔවුන් නිස්‌සාරණය කරගන්නවා. යකඩ, ටයිටේනියම් සහ නිකල් මේ අතර වනවා. ඔවුන් හුණුගල්, ඔලිවින් සහ විවිධ පාෂාණ වර්ග ද අපනයනය කරන බව තමයි පැවසෙන්නේ.

ඉතා ම සුහදශීලී මිනිසුන් සිටින රටක්‌ වන නෝර්වේ රාජ්‍යයේ බොහොමයක්‌ අය උතුරු ජර්මානු ජාතිකයන්. එයට අමතරව වැඩි ම සංක්‍රමණිකයන් පිරිසක්‌ සිටින රටක්‌ ලෙසත් සලකන්න පුළුවන්. ශ්‍රී ලාංකිකයන් ද සැලකිය යුතු පිරිසක්‌ එහි වෙසෙනවා. මිනිසුන්ට අවශ්‍ය බොහොමයක්‌ පහසුකම් එම රජයෙන් සපයා තිබෙන අතර සෞඛ්‍ය පහසුකම් සහ ගමනාගමන පහසුකම් ඉන් මුල්තැන ගන්නා බවයි අපට තේරුම් ගියේ. අප ගේ සංචාරය කේන්ද්‍රගත වූ ඔස්‌ලෝ නගරය ඉතා කදිම ප්‍රවාහන පද්ධතියකින් සමන්විතයි. ට්‍රෑම් කාර් මෙන්ම කාර්යක්‌ෂම දුම්රිය සේවයක්‌ ද මෙහි පවත්වාගෙන යනු ලබනවා. බොහොමයක්‌ දෙනා තම තමන් ගේ වාහන ගෙදර දමා කාර්යාලයට මෙන්ම කඩපිලට යන්නෙත් මේවායින්. එනිසා අප දුටු තවත් සුවිශේෂීතාවක්‌ වන්නේ වාහන තදබදය අවම වීමයි.

මහා මාර්ගයේ දී පළමු තැන හිමි වන්නේ පයින් ගමන් කරන්නාට වන අතර දෙවැන්න බයිසිකල් කරුවාටයි. මෝටර රථ පදවන්නන්ට හිමි වන්නේ අවසාන තැනයි. එනිසා මාර්ග අනතුරු නගරය තුළ අවම වනවා පමණක්‌ නො වේ මෙනිසා පරිසර දුෂණය ද ඉතා ම අඩුවෙන් පවත්වාගෙන යන්නට ඔවුනට හැකි වී තිබෙනවා. පයින් ගමන් කරන්නා ද, බයිසිකල්කරුවා ද එනිසා බොහෝ දිරිමත් වන අතර එය ඔවුන් ගේ සෞඛ්‍යය රැකගැනීමට ද අනියම් ලෙස බලපාන බවයි පෙනෙන්නේ. එය එක්‌තරා අකාරයකට රෝහල් සදහා වාර්ෂිකව වැය වන මුදල කිසියම් ප්‍රමාණයකට අඩු කිරීමක්‌. එපමණක්‌ නො වේ, කාර්යාලවල කාර්යක්‌ෂමතාව ඉහළ නංවන්නක්‌.

වර්තමානයේ ඔස්‌ලෝ නගරයේ පරිපාලනය පරිසර දූෂණයෙන් තොර නගරයක්‌ ලෙස පවත්වාගෙන යැමට තීරණය කර තිබෙනවා. එනිසා ඉදිරි කාලයේ නගරයට පෞද්ගලික වාහන ඇතුළු වීම සපුරා තහනම් කෙරෙනු ඇති. මේ කාලයේ බොහෝ රටවල ජනප්‍රිය වෙමින් යන විදුලි මෝටර් රිය ද මේ රටට සැපත් වී ඇති බව පෙනෙන්නට තිබුණා. දැනගන්නට ලැබුණ තොරතුරු අනුව විදුලි මෝටර් රිය භාවිතය දිරිමත් කිරීම සදහා මේ මෝටර් රථ ආරෝපණය සදහා විදුලිය නොමිලයේ ම ලබා දෙනවා. බොරතෙල් බහුල රටක්‌ වුව ද මේ තීරණය ගෙන ඇත්තේ පාරිසරික සංරක්‌ෂණය උදෙසා ම බව ඉතා පැහැදිලි කරුණක්‌. අපේ රට හා සැසඳීමේ දී අප ඉන්නේ කොතැන ද යන්නත් පරිපාලනය කෙතරම් අවස්‌ථාවාදී ද යන්නත් ඔබට වැටහෙනු ඇති.

වසරේ මාස හයක්‌ පමණ ම සීත දේශගුණයකින් යුක්‌ත මේ රට එනිසා ම එම කාලය මුළුල්ලේ ම හිමෙන් වැසි තිබීම සුවීශේෂීත්වයක්‌. වසර 30කට පමණ පසු වාර්තා වූ අවම උෂ්ණත්වය වන සෙල්සියස්‌ අංශක Rණ 18 (-18) වාර්තා වූයේ අප එරටින් පිට වූ දවසේයි. ඔවුන් ගේ කාලගුණික අනාවැකි ඉතා ම සාර්ථක බව අප එහි වාසය කළ දින කිහිපයේ දී මනාව අත්විඳීමට ලැබුණා. ඔවුන් නවතම තාක්‌ෂණයන් භාවිත කරන අතර ඔවුන් හා සැසඳීමේ දී අප ගේ කාලගුණ අනාවැකි අන්ධයන් ගේ වැනි යෑයි අපට සිතුණා. ඉතා ම සතුටුදායක කාලයක්‌ ගත කරන්නත් ඒ වාගේ ම අපූරු අත්දැකීම් සම්භාරයක්‌ ලබාගන්නත් මේ චාරිකාවෙන් අපට අවස්‌ථාව ලැබුණා. අප බොහෝ දෙනකු මෙරට හා සම්බන්ධව නෝර්වේහි ක්‍රියා කලාපය අනුමත නො කෙරුවත් එරට අපට බොහෝ ආදර්ශ ගෙන එන බවයි අප ගේ හැඟීම වන්නේ.

ආචාර්ය පත්මකුමාර ජයසිංහ

විදුපත්ඉරුව
20.01.2016

පසුගිය අවුරුද්දේ එක්‌තරා වැඩමුළුවකට සහභාගී වීමට සිදු වූ අතර එහි දී ද කතාබහට ලක්‌ වූයේ ස්‌වාභාවික අනතුරුවලට මුහුණපාන මිනිසුන් ගේ ම අභිවෘද්ධිය උදෙසා ගත යුතු ක්‍රියාමාර්ග සහ සංවිධානය විය යුතු ආකාරය පිළිබඳවයි. එය වඩා සාර්ථක විය යුතු ආකාරයත් බිම් මට්‌ටමට එවැනි ක්‍රියාමාර්ග ගෙන යා යුතු බවත් කෙලෙස එය සිදු කළ යුතු ද යන්නත් එහි දී සංවාදයට තුඩු දුන්නා. එහි දී එයට සහභාගී වූ එක්‌ පුද්ගලයකු ගේ අදහස වූයේ කිසිදු පොදු කර්තව්‍යයක්‌ ශ්‍රමදාන මාර්ගයෙන් සිදු නො විය යුතු බවත් ඒ සියල්ල රජය විසින් ඉටු කරනු ලැබිය යුතු බවත්. එසේ කළ යුත්තේ සියලු රට වැසියන් රජයට බදු ගෙවන බැවින් බවයි ඔහු හේතුව ලෙස පැවසුවේ. එය ප්‍රථම වතාවට එවැනි අදහසක්‌ මා කන වැකුණ අවස්‌ථාව වූ අතර එනිසා ම එය මා අතිශයින් ම විමතියකට ද කලකිරීමකට ද පත් කරන්නක්‌ ද වුණා. කෙසේ වෙතත් එලෙස අදහස්‌ ප්‍රකාශ කළ තැනැත්තා රාජ්‍ය නො වන සංවිධානයක සේවය කරන තැනැත්තකු බවයි පසුව හෙළි වූයේ. මෙවැනි අදහස්‌ සහ එම අදහස්‌ දරන තැනැත්තන් ඇත්තෙන් ම ඉතා භයානක ලෙස අප සමාජයට හානියක්‌ කරන බවයි මගේ අදහස. එපමණක්‌ නො වේ. ජාත්‍යන්තරය හා ඔවුන් නිරතුරු ගැටෙන බැවින් ජාත්‍යන්තරයට ගෙන යන්නේ ද ඔවුන් ගේ මෙවැනි විකෘත අදහස්‌. එය සැම විට ම රටෙහි පොදු දැක්‌ම නො වුවත් ජාත්‍යන්තරයේ එවැනි දුර්මතයන් පොදු මත ලෙස පිළිගැනෙන්නට එනිසා ම බොහෝ ප්‍රස්‌ථා සැලසෙනවා.

මා කුඩා කාලයේ ගමේ බොහෝ පොදු වැඩ ඉටු වූයේ ශ්‍රමදාන මාර්ගයෙන්. ගමේ වැඩිහිටියන් ගේ එකමුතුව එමගින් පිළිබිඹු වුණා. ගමට පාර කැපුණේත් ශ්‍රමදානයෙන්. පසුව පාරවල් පිරිසිදු කළේත් ශ්‍රමදානයෙන්. පාසලේ මෙන්ම පන්සලේ සිදු කළ බොහෝ කාර්යයන්, පින්කම් සිදු වූයේත් ශ්‍රම දායකත්වයෙන්. දෙන්නට පුරුදු පුහුණු වූ ශ්‍රී ලාංකිකයන් සිය ශ්‍රමයත් ඒ අයුරින් පොදු වැඩ සදහා දෙන්නට පුරුදු වී සිටියා. එපමණක්‌ නො වේ. පෞද්ගලික වැඩ සිදු වුණේත් මේ ආකාරයෙන් මයි. ගොයම් කයිය වැනි කුඹුරු කර්මාන්තයේ විවිධ අවස්‌ථා ගමේ මිනිසුන් ගේ දායකත්වයෙන් තමයි සිදු වුණේ. එනිසා වැඩි අපහසුවකින් තොර ව ගමේ බොහෝ කාර්යයන් ඉටු කරගැනීමට හැකි වුණා. සුළු පරිමාණයේ පොදු වැඩ කටයුතු, පවතින රජයෙන් සිදු වන තුරු බලා සිටීමක්‌ එකල දක්‌නට තිබුණේ නැහැ. මහා පරිමාණයේ කටයුතුවලට පමණයි රජයේ අනුග්‍රහය පැතුවේ. ශ්‍රමදානය අප නො සිතන ලෙස ගමෙහි එකමුතුව වගේ ම අයකු ගේ අමනාපය ද අමතක කරවන ඉතා කදිම මනෝවිද්‍යාත්මක මෙන්ම සමාජ විද්‍යාත්මක සන්දර්භයක්‌ බව වර්තමානයේ බොහෝ දෙනකුට නො වැටහීම ඉතා කණගාටුවට කරුණක්‌.

ගමේ පොදු ප්‍රශ්නවලට පිළිතුරු, එකමුතු වූ ගමේ සමාජය පොදුව එක්‌ ව සෙවූ අතර එනිසා ඉතා සාර්ථකව ගැටලු මැඩපවත්වන්නට ඔවුනට හැකි වුණා. ගමේ වැඩිහිටියන් තම තමන් ගේ ජීවිත අත්දැකීම් තුළින් අනාගතය දුටු අතර බොහෝ කාර්යවල දී පෙරමුණ ගත්තා. පොදු වැඩවල දී ජවය සැපයුවේ ගමේ තරුණ පිරිසයි. ඔවුන් ගේ සහභාගිත්වයේ අරමුණ ජවය සැපයීම ම පමණක්‌ නො වෙයි. අනාගත නායකත්වය සදහා ඔවුන් වැඩිහිටියන් ඇසුරෙන් පුරුදු පුහුණු වුණේත් මෙවැනි පොදු වැඩවලට සහභාගී වීමෙන්. එනිසා අග්‍රගණ්‍ය වූ ප්‍රත්‍යක්‌ෂ වූ අතීත දැනුම අනාගත පරම්පරාවට සම්ප්‍රේෂණය කරන්නට අපේ මුතුන් මිත්තන්ට ආයාසයකින් තොර ව හැකි වුණා. ජීවිත අත්දැකීම් ලබාගන්නටත්, අවවාද අනුශාසනා ලබන්නටත් කුඩා දරුවන්ට මෙවැනි ස්‌ථාන තෝතැන්නක්‌ වුණා. "ශ්‍රමදාන" සංකල්පය පැරැණි ඉතා වටිනා සංකල්පයක්‌ වන්නේ සියල්ලන් ගේ ම අදහස්‌ සදහා අවස්‌ථාවක්‌ මෙන්ම වඩාත් සුදුසු ම පිළිතුරට, විකල්පයට, ක්‍රියාවලියට එමගින් ඉඩ ලැබෙන බැවින්. වඩාත් උචිත සංකල්ප බිහි වන්නට අගනා සාරභූමියක්‌ එමගින් බිහි වුණා.

වර්තමානයේ විද්‍යා ලෝකය තුළත් විවිධ විද්‍යාත්මක ගැටලුවලට එක්‌ ව පිළිතුරු සෙවීම වඩාත් ප්‍රචලිත වෙමින් පවතින බවයි පෙනෙන්නේ. විද්‍යා පර්යේෂණයක්‌ කළත් එයට ද බහු විෂයාත්මක ප්‍රවේශයක්‌ ලබා දීම සදහා බොහෝ විද්‍යාඥයින් උත්සුක වන බවයි පෙනෙන්නේ. බහු විෂයාත්මක ප්‍රවේශය විද්‍යාත්මක ගැටලු විසඳීමේ දී ඉතා සාර්ථක වී තිබෙනවා. සමහර ක්‌ෂේත්‍රවල දී බහු විෂයාත්මක ප්‍රවේශය අත්‍යවශ්‍ය වනවා. ඉතා සරල උදාහරණයක්‌ වන්නේ පුරාවිද්‍යාත්මක පර්යේෂණයි. තවත් එවැනි ක්‌ෂේත්‍රයක්‌ වන්නේ අධිකරණ විද්‍යාව. එහි දී බොහෝ විද්‍යාත්මක විෂයන්වල සහයෝගය අත්‍යවශ්‍ය වනවා. බහු විෂයාත්මක ප්‍රවේශය මගින් පටු අදහස්‌ ඉතා පුළුල් ලෙස විග්‍රහ කරවීමට අවස්‌ථාව එළඹෙන අතර එමගින් වඩාත් සුදුසු සහ නිවැරැදි තීරණ සදහා අවස්‌ථාව උදා වීම එහි ඇති විශේෂ වාසියක්‌.

මේ සැම අවස්‌ථාවක දී ම සැම ගේ අදහස්‌ උදහස්‌ නිති සාකච්ඡාවට බඳුන් වනවා. අභියෝගයට ලක්‌ වනවා. එනිසා සාර්ථක බව සැම විට ම ඉතා ළං වනවා. බහු විෂයාත්මක ප්‍රවේශයක දී එකිනෙකා ගේ අදහස්‌ ඉතා වැදගත් වන්නේ එබැවිනුයි. වඩාත් සුදුසු අදහස්‌ සහ තීරණ ගැනීම සදහා තම අදහස්‌ ප්‍රකාශ කිරීම ඉතා වැදගත්. විද්‍යාත්මක සාකච්ඡාවල දී අප බොහෝ දෙනකු තම අදහස්‌ ප්‍රකාශ නො කරන බවයි පෙනෙන්නේ. එය රටේ සංවර්ධන ප්‍රගමනයට කරන අසාධාරණයක්‌ බවයි හැඟෙන්නේ. තම ජීවිත කාලය තුළ දී අයකුට බොහෝ ඉතා වටිනා අදහස්‌ පහළ විය හැකියි. නමුත් එම අදහස්‌ ක්‍රියාත්මක කිරීම අයකු ගේ ජීවිත කාලයේ දී කෙසේ වත් සාර්ථක කරගැනීමට තනි ව හැකි වන්නේ නැති වන්නට පිළිවන්. අදහස්‌ ප්‍රකාශනය, වටිනා අදහස්‌ ක්‍රියාත්මක කළ හැකි අයකුට හෝ කණ්‌ඩායමකට හෝ දක්‌වන සහයෝගයක්‌. අප සමග ම වටිනා සංකල්ප වැළලී යැමට ඉඩ නො දිය යුතුයි. සංකල්ප අප ගේ වුවත් ඒවා ක්‍රියාත්මක කළ හැකි අයකු හෝ කණ්‌ඩායමක්‌ හෝ වෙයි නම් වැදගත් වන්නේ එයයි. කවුරු කෙසේ ක්‍රියාත්මක කළත් රටට හෝ ලෝකයට හෝ වැදගත් වන්නේ නම් එයයි අවශ්‍ය කරන්නේ.

ආචාර්ය පත්මකුමාර ජයසිංහ

විදු පත්ඉරුව
13.01.2016

කාලය ඉතා ම වේගයෙන් ගලා යනවා. දින සති මාස ගත වී වසර අවසන් වන්නේ අපට හිතාගන්නටත් බැරි තරමේ වේගයකින්. වසර අවසානයේ දී ආපසු හරි බැලූ විට ඔබට සිතන්නේ කුමක්‌ ද? ඔබ එම කාලය ප්‍රයෝජනවත් ලෙස භාවිත කළේ ද යන්න ඔබට එවිට වැටහෙනු ඇත. නිසි කළමනාකරණය තුළ අයකුට කාලය කෙසේ වත් ගැටලුවක්‌ නො වනු ඇත. එබඳු අය කාලය ඩැහැගන්නේ කාලයටත් සිතාගන්නට නොහැකි ලෙසිනි. පැයක වැඩ කළමනාකරණය කරගන්නට හැකි තැනැත්තා ඉතා පහසුවෙන් දිනෙක වැඩ ද, සතියේ වැඩ ද, මාසයේ වැඩ ද ඉතා කාර්යක්‌ෂමව ඉටු කරගනී. මෙහි දී වඩා වැදගත් වන්නේ තමාට සිදු කිරීමට ඇත්තා වූ කාර්යය කුමක්‌ ද යන්න නිසි පරිදි වටහාගැනීමයි. ඉතා ඉක්‌මනින් ඉටු කළ යුතු අතවශ්‍ය කටයුතුවලට ප්‍රමුඛතාව දිය යුතු ය. ප්‍රමුඛතාව තමාට පැටවෙන වගකීම මත ද තීරණය කළ යුතු වේ. කාර්ය ප්‍රමුඛ කාලසටහනක්‌ සකස්‌ කරගැනීම, ඉතා පහසුවෙන් තමා කළ යුත්තේ කුමක්‌ ද යන්න තීරණය කළ හැකි ක්‍රමවේදයකි. ඒ අතර අයකුට අවශ්‍ය නම් දිනපොතක්‌ භාවිත කළ හැකි ය. නිසි ලෙස කාර්ය කළමනාකරණය කරගන්නා තැනැත්තා අනෙක්‌ සැමට ම ඉදිරියෙන් බව අප සිතට ගත යුතු ය. එපමණක්‌ නො වේ. පරිණත නයකත්වයේ එක්‌ අංගයක්‌ වන්නේ කලට වෙලාවට තීන්දු තීරණ ගැනීමයි.

නිසි කල නිසි දෙයට ප්‍රමුඛතාව දී අදාළ කාර්යය ඉටු කිරීමට බොහෝ දෙනා උත්සුක නො වන බව පැහැදිලි වේ. එහි භයානක තත්ත්වය නම් එවැනි පුද්ගලයන් ජාතික තලයේ වැඩකටයුතුවල දී ගන්නා තීන්දු තීරණවල දී ඇති වන දුර්වලතාවන් ය. දුරදර්ශී නො වන ඔවුන් ගේ පරිපාලනය එනිසා බොහෝ කාර්යයන් ප්‍රමාද කරන අතර අවුල් සහගත තත්ත්වයක්‌ ඇති කරයි. මේ සදහා අප රට තුළින් ම නොයෙකුත් උදාහරණ ගෙනහැර පෑ හැකි ය. එවැනි එක්‌ උදාහරණයක්‌ වන්නේ කොළඹ එකතු වන කුණු කසළ බැහැර කිරීම සදහා ක්‍රමවත් ප්‍රායෝගික ක්‍රමවේදයක්‌ ස්‌ථාපිත කරගැනීමට මෙතෙක්‌ නොහැකි වීමයි. මේ ක්‌ෂේත්‍රයේ බොහෝ ප්‍රවීන විද්‍යාඥයන් කොතරම් විසදුම් යෝජනා කළ ද ඒවා ප්‍රායෝගිකව ක්‍රියාවේ යෙදවීමට නොහැකි වී ඇත. දශක ගණනාවක්‌ තිස්‌සේ මේ ප්‍රශ්නයෙන් අපි පිඩා විඳිමු. කුණුකසළ යනු ධන සම්පතක්‌ බව බොහෝ දෙනා පවසති. ඇත්තෙන් ම එය එසේ ම ය. බොහෝ දේවල් ප්‍රතිචක්‍රීකරණය කළ හැකි අතර තවත් බොහෝ දේ ඉතා පහසුවෙන් දිරන ද්‍රව්‍ය වේ. ශක්‌ති අවශ්‍යතාව ඉතා ඉහළින් ඇති අප රටට ඉතා පහසුවෙන් මේ ශක්‌ති අවශ්‍යතාව තරමක්‌ දුරට හෝ මෙමගින් සපුරාගත හැකි ය. කසළ බැහැර කිරීමේ නිසි ක්‍රමවේදයක්‌ ස්‌ථාපිත නො වීම තුළ ලෙඩ රෝග පැතිරීම ඇතුළු අනේකවිධ ගැටලු මතු වෙයි. නිසි කල නිසි පරිදි මේ ගැටලුව නිරාකරණය කළේ නම් මේ වන විට ගැටලු රැසකට විසඳුම් ලැබී බොහෝ වාසි අත් වී හමාර ය.

තවත් මෙවැනි ම නිසි කල පිළිතුරු නො දුන් දැවෙන ගැටලුවක්‌ වන්නේ සංස්‌කෘතික උරුමයන් සංරක්‌ෂණයයි. දශක පහක හයක කාලයක්‌ තිස්‌සේ විද්‍යාත්මක ක්‍රමවේදයන් ඒ සදහා ස්‌ථාපිත කිරීමට තැත් කරන අතර නොසුදුසු පුද්ගලයන් ගෙන් ද දුර්වල ක්‍රමවේදයන් ගෙන් ද එම ක්‌ෂේත්‍රය සමන්විත වීම නිසා අද බොහෝ ගැටලු රැසකට අප මුහුණ පාන බව පෙනී යන කරුණකි. ලෝක උරුමයක්‌ වූ සීගිරිය ශ්‍රී ලංකාවට ගෙන එන ආර්ථික වාසිය සුළුපටු නො වේ. විදේශික සංචාරකයන් සීගිරියට ඇද බැඳ තබාගන්නේ කරුණු දෙකක්‌ හේතුවෙනි. එකක්‌ වන්නේ සීගිරි චිත්‍ර වන අතර අනෙක වන්නේ කැටපත් පවුර ය. මේ දෙක ම අද වන විට නිසි අධීක්‌ෂණයකින් සහ නිසි සංරක්‌ෂණයකින් තොර වීම නිසා ඉතා ශීඝ්‍රව විනාශ වෙමින් පවතී. මෙවැනි සංස්‌කෘතික උරුමයන් ආරක්‌ෂා කරගැනීමට සුදුසු විද්‍යාත්මක ක්‍රමවේදයක්‌ සහ පර්යේෂණ සදහා ප්‍රස්‌තාව අහිමි වී ඇත්තේ ඒ සදහා සුදුසු ප්‍රවීනයන් මේ ක්‌ෂේත්‍රයට පත් නො වීම හේතුවෙන් පමණක්‌ ම නො වේ. ක්‌ෂේත්‍රයේ ඉන්නා ප්‍රවීනයන් ගෙන් අදාළ කාර්යය ඉටු කරගැනීමට හැකි නායකත්වයක්‌ නොමැති වීම ද ඊට හේතු වී ඇත. විද්‍යාත්මක සංරක්‌ෂණ ක්‍රමවේද ස්‌ථාපිත කිරීම සහ ඒ සදහා සුදුසු පුද්ගලයන් ක්‌ෂේත්‍රයේ නො වීම සදහා හේතු වී ඇත්තේ පෞද්ගලික වුවමනා එපාකම් මෙන්ම දේශපාලනික හේතූන් බව අපි අත්දැකීමෙන් ම දනිමු. සුදුසු විද්‍යාඥයන් මෙන්ම විද්‍යාත්මක ක්‍රමවේද නිසි කල ස්‌ථාපිත කිරීම සදහා අදාළ ආයතනික නායකත්වය අපොහොසත් වීම අතිශය කණගාටුවට කරුණකි. අවසානයේ වන්නේ රටට සම්පතක්‌ වන බොහෝ ආර්ථික වාසි ගෙන දෙන මෙවැනි උරුමයන් අප ඇස්‌ ඉදිරියේ ම විනාශ වී යැමයි. රටක වටිනා ම සම්පතක්‌ මෙලෙස විනාශ වන්නේ නිසි කල නිසි තීන්දු තීරණ ගැනීමට නොහැකි වීම නිසා බව නැවතත් සඳහන් කළ යුතු ව ඇත.

ඔබ විද්‍යා විෂය හදාරන්නකු නම් විද්‍යාගාරය තුළ විවිධ පරීක්‌ෂණ සිදු කර තිබෙනු ඇත. බොහෝ පරීක්‌ෂණ යම් කාල පරාසයක්‌ තුළ සිදු කළ යුතු ඒවා මෙන්ම එක්‌ එක්‌ කාල අන්තරවල දී යම් වෙනස්‌කම් සිදු කිරීමට නියමිත ව ඇති බව ඔබට වැටහෙනු ඇත. ඒවා සිදු නො කළේ නම් ඔබට නිසි ප්‍රතිපල අත් නො වන බව විටෙක ඔබ අත්දැකීමෙන්ම දැනගනී. එය ම තම ජීවිතයට පාඩමක්‌ කරගන්නේ කී දෙනකු ද යන්න ජීවිතයේ ජයග්‍රහණ ළං කරගත්තවුන් දෙස බැලීමෙන් ම පෙනී යයි. සමස්‌තය තමන් ලබන අHdපනය ප්‍රායෝගිකව යොදාගන්නේ ඉතා අඩුවෙන් බව කිව යුතු ය. කළමනාකරණය කරන ලද කාලය තුළ ජීවත් වන්නන් ජය දද නංවන බව නොරහසකි. එය රටක්‌ ලෙස ද ගත් කල අත්‍යන්ත සත්‍යයකි. එසේ හෙයින් ඒ සදහා මනා ශික්‌ෂණයක්‌ සහිත අනාගත පරපුරක්‌ බිහි කරගැනීමට අප සැවොම උත්සුක විය යුතු ය.

ආචාර්ය පත්මකුමාර ජයසිංහ

විදුපත් ඉරුව
06.01.2016


විදුපත් ඉරුව ලියන්න පටන් අරන් දැන් හරියටම අවුරුද්දක්‌ වෙනවා. මේ වෙන කොට ලිපි හතළිස්‌ නවයක්‌ පමණ ලියා අවසන්. මේ ලියවෙන්නේ එතකොට පනස්‌ වැනි ලිපිය. විවිධ මාතෘකා ඔස්‌සේ මා උකහාගත් දැනුම ඔබ වෙතට මේ අයුරින් හෝ ගෙන ඒමට ලැබීම සතුටක්‌. ඊටත් වඩා මා සතුටු වන්නේ මෙලෙස ලබා දෙන දැනුමෙන් කිසියම් කෙනෙකු ප්‍රයෝජනයක්‌ ගන්නවා නම්. මා සිතනවා විශේෂයෙන් ම විදුසර කියවන පුතාලා දූලා තම අධ්‍යාපන ගමන සාර්ථක කරගැනීමට විදුසර සඟරාව අත්වැලක්‌ කරගෙන ඇතැයි කියා.

මගේ විද්‍යා දැනුම පෝෂණය කරන්නට මුල සිට ම ඉවහල් වූයේ විදුසර විද්‍යා සඟරාවයි. එය මා නොසඟවා පැවසිය යුතු සත්‍යයක්‌. එය විද්‍යාවේ විවිධ මාතෘකා ඔස්‌සේ විවිධ විෂයන් ඔස්‌සේ ගෙන ආ තොරතුරු ඇත්තෙන් ම මා නිරන්තරයෙන් ම විස්‌මයට පත් කළා පමණක්‌ නො ව කුතුහලයට ද පත් කළා. එනිසා විද්‍යාව කෙරෙහි නිරන්තරයෙන් ම මා ඇද බැඳ තබාගත්තේ විදුසර බව කියන්න පුළුවන්. අද තරම් තොරතුරු සන්නිවේදනය නොදියුණු ඒ යුගයේ පත්තරවලට ඉතා ඉහළ තැනක්‌ තිබුණා. විදුසර ගෙන ආවේ දැනුම පමණක්‌ නො වේ. විශ්ව විද්‍යාව අතැඹුලක්‌ කර අප වෙතට ගෙන ආවේත් ගෙන එන්නේත් විදුසරයි.

විද්‍යාව කවදා කෙසේ ආරම්භ වුවත් අප නිසි ලෙස අධ්‍යාපන කටයුතු සිදු කරන්නේ නම් එහි තාර්කික ස්‌වරූපයට අභියෝග කළ නොහැකියි. එනිසා යමක්‌ ඉගෙනගන්නේ නම් නියමාකාරයෙන් ම ඉගෙනගැනීම අතාර්කික, අසංවර සහ නිෂ්ඵල ප්‍රතිඵල අත් කර දෙන්නේ නැහැ. නිර්මාණාත්මක දැනුම බිහි කරන්නන් ගේ හිගයට මූලික හේතු වන්නේ නිසි පදනමක්‌ නොමැති වීමයි. වර්තමානයේ අධ්‍යාපන රටාව තුළ ඇත්තේ සිරගත මනස්‌ සහිත රොබෝ යන්ත්‍ර බිහි කරන යාන්ත්‍රණයක්‌ මිස බුද්ධිය මෙහෙයවා නිර්මාණශීලීව විශිෂ්ට අනාගතයක්‌ නිර්මාණය කළ හැකි පිරිසක්‌ බිහි කරන යාන්ත්‍රණයක්‌ නො වන බව වටහාගැනීම අපහසු නැහැ. අතරින් පතර විශිෂ්ට නිර්මාණශීලීන් බිහි වුවත් උසස්‌ නිර්මාණ අගය කළ හැකි බහුතරයක්‌ බිහි නො වීම, විශිෂ්ටයන් අගය නො කිරීමට ද හේතුවක්‌ වී තිබෙනවා.

බොහොමයක්‌ අධ්‍යාපන ආයතනවල ඉගෙන ගැනීමේ දී අනුගමනය කළ යුතු කරුණු කාරණා නිසි ලෙස භාවිත නො වන බව ද, දරුවන්ට අවබෝධ කර නො දෙන බව ද රහසක්‌ නො වේ. එයට හේතු ගණනාවක්‌ ම ඇති මුත් ප්‍රධාන ම කරුණ වන්නේ එවැනි දේ පිළිබඳව ඔවුන් නො දැන සිටීමයි. නොසැලකිලිමත් බව ද ඒ අතර වන බව අමතක නො කළ යුතුයි. දරුවන් ගේ සෞඛ්‍යය මෙහි දී තීරණාත්මක වන අතර සන්සුන් මනසක්‌ ඇති කරගැනීමේ දී නිසි පෝෂණය මනාව ලැබිය යුතුයි. මොළයට නිසි ඔක්‌සිජන් සැපයුමක්‌ ලැබීම එහි ක්‍රියාකාරිත්වය හොඳින් පවත්වාගෙන යැමට විශාල උපකාරයක්‌ බව අමතක නො කළ යුතුයි. මේ සදහා වැදගත් වන්නේ රුධිරයේ ඔක්‌සිජන් ප්‍රවාහනය කරන හිමොග්ලොබින් මට්‌ටම ප්‍රශස්‌තව පවත්වාගෙන යැමයි. යකඩ ඌනතාව රුධිරයේ හිමොග්ලොබින් මට්‌ටම පහත හෙළීමට හේතු වන අතර යකඩ බහුල ආහාර නිතර කෑම වේලට එක්‌ ගැනීමෙන් එය මගහරවාගත හැකියි. අඩු රුධිර පීඩනයට ද සෙම වැනි තත්ත්ව සඳහා ද අඩු ඔක්‌සිජන් සැපයුම හේතු වන බවයි පැවසෙන්නේ.

නොසන්සුන්තාව, එක තැනක සිට වැඩකට සිත යොමු කිරීමට නොහැකි වීම, කේන්ති යැම වැනි ලක්‌ෂණ මොළයට අඩු ඔක්‌සිජන් මට්‌ටමක්‌ නො ලැබීමේ තවත් ප්‍රතිවිපාක වනවා. එනිසා සංකීර්ණ ගැටලු විසඳීමට ඉදිරිපත් නො වීම, ප්‍රශ්නවලින් පැන යැම මෙන්ම පාඩම් කිරීමේ දී සින්දු අසමින් පාඩම් කිරීම වැනි තත්ත්ව ද වැඩිදුරටත් ඇති විය හැකියි. නිසි පෝෂණය සමග ක්‍රීඩා කිරීම ව්‍යායාම කිරීම වැනි දේ මගින් ද ප්‍රාණයාම ව්‍යායාම කිරීම මගින් ද එම තත්ත්වයන් මගහරවාගත හැකි වනවා.

ඒ වගේ ම කුඩා දරුවන් වසර 12 පමණ වන තෙක්‌ ඉතා හොඳින් රැක බලා ගත යුතුයි. මේ කාලය තුළ දී කරන කියන බොහෝ දේ ඔවුන් ගේ යටි හිතට ඇතුළු වන අතර ඒවා වැඩිහිටියකු වීමෙන් පසු නැවත උඩු හිතට විත් ක්‍රියා කරන බව පර්යේෂණාත්මකව ඉතා පැහැදිලිව පෙන්වා දී තිබෙනවා. එනිසා ළමයකු අධෛර්යවත් කරන වචන හෝ ක්‍රියාකාරකම් ළමයකුට අත්විඳීමට සැලැස්‌විය යුතු නැහැ. එවැනි දේ මගින් සිතෙහි ඇති වන කැළැල් සමහර විටෙක සදාකාලික වන අතර එය ළමයා ගේ අනාගතය සදා අඳුරු කළ හැකියි. සෞම්‍ය වචන භාවිතය මෙහි දී ඉතා වැදගත් වන අතර නවීන ළමා මානසික විද්‍යාවේ පමණක්‌ නො ව අපේ අතීත දේශීය දැනුමේ ද මේ සම්බන්ධව බොහෝ කරුණු කාරණා සඳහන් වී ඇති බව අප අමතක නො කළ යුතුයි.

ඊළඟට අමතක නො කළ යුතු වැදගත් ම කරුණ වන්නේ සැම දරුවකු ම එක ම ලෙස දක්‌ෂයන් නො වන බවයි. ඔවුන් ගේ දක්‌ෂතා මතු වන්නේ ජීවිතයේ එක්‌තරා කාලයක්‌ ගිය පසුවයි. මේ සම්බන්ධව හොඳ ම උදාහරණය වන්නේ අයින්ස්‌ටයින් නමැති විද්‍යාඥයායි. ඔහු කුඩා කල ඉගෙනීමට දුර්වල ශිෂ්‍යයකු බව සදහන්. එහෙත් පසුකාලීනව ඔහු ලෝ ප්‍රකට විද්‍යාඥයකු බවට පත් වුණා. එනිසා දරුවන් ගේ පසුගාමී බව, අසනීප තත්ත්වයක්‌ නො වේ නම් කලබල විය යුතු දෙයක්‌ නො වන අතර, සැම විට ම අවධානයෙන් සිටීම තමයි වැදගත් වන්නේ.

දරුවන් ගේ අධ්‍යාපනයට සැම අතින් ම උචිත පරිසරයක්‌ කවදා කොතැන කෙලෙසක මේ රටේ ගොඩනැෙගන්නේ ද යන්න සාකච්ඡා කිරීම පවා විහිළුවක්‌ වන කාලයක කුඩා දරුවන් ගේ මනසේ අවම වශෙයන් හෝ විශිෂ්ටයන් බිහි කළ හැකි පරිසරයක්‌ ගොඩනැගීමේ සංකල්පීය බීජයක්‌ හෝ තැන්පත් කිරීම අප ගේ යුතුකමක්‌ වන අතර ඉදිරි පරම්පරා කිහිපයක්‌ හෝ ගත වී මේ අරමුණ සතුටුදායක මට්‌ටමකින් සාක්‌ෂාත් කරගත හැකි වේ යෑයි අපි පතමු.

විදුපත් ඉරුව ගැන ඔබ ගේ අදහස්‌ උදහස්‌ දැනගැනීමට කැමැතියි. එම අදහස්‌ පහත දුරකථන අංකයට හෝ විද්යුත් තැපෑලට හෝ යොමු කරන්න.

0718433319, jpathmak@gmail.com

ආචාර්ය පත්මකුමාර ජයසිංහ

විදු පත් ඉරුව
30.12.2015

ඔබ කෙදිනක හෝ සමනළයන් ගේ බිත්තර දැක තිබේ දැයි සිහි කරන්න. මා හට ඒ අවස්‌ථාව මෑතක දී නැවත උදා වූයේ, අප කළ සංචාරයක දී මා මිතුරු විමුක්‌ති ගේ පිහිටෙනි. ඔහු එහි දී තෝර ගසක පත්‍රවල සවි වී තිබූ සුදු පැහැති සමනළ බිජු දැකගැනීමට සැලැස්‌වූ අතර සමනළ ලෝකය කෙරෙහි පෙර තිබූ මා ගේ උනන්දුව නැවත වර්ධනය කිරීමට ඒ දසුන හේතු විය. මෙවර විදුපත් ඉරුවේ ඒ පිළිබඳව සටහනක්‌ තැබිය යුතු යෑයි එදින මා අදිටන් කරගත්තේ විදුසර පාඨකයන් ගේ ද අවධානය මේ කෙරෙහි යොමු කරවීම වටින්නේ යෑයි සිතූ බැවිනි. ඔබ පරිසරය හොඳින් නිරීක්‌ෂණය කළේ නම් ශාක පත්‍රවල යට පැත්තේ හෝ වටේ දාරවල මේ බිත්තර රැඳී තිබෙන අයුරු ඔබට දැක ගත හැකි වනු ඇත. විවිධ පැහැ සහ හැඩයන් ගත් බිත්තර විවිධ සමනළ විශේෂ නියෝජනය කරන අතර, බිජු ලෑම සදහා විශේෂිත ශාක වර්ග ඔවුන් විසින් තෝරාගනු ලැබේ. ඒ බිත්තර පිපිරී එළියට එන දළඹුවා ගේ ආහාරයට සරි වන ලෙස ය.

"රූපාන්තරණය" නම් අපූරු සංසිද්ධියකි. රූපණය වෙනස්‌ වෙමින් ගලා යන තම ජීවන චක්‍රයේ සමනළයා අවධි හතරක්‌ ගත කරන්නේ ඒවායේ සුවිශේෂීතා විදහා දක්‌වමිනි. එයින් ද කෝෂගත අවධිය වසරක්‌ පමණ කාලයක්‌ දක්‌වා වුව ද දික්‌ විය හැකි බව පර්යේෂණවල දී පැහැදිලි වී තිබේ. කෝෂ්ඨයෙන් එළියට එන සමනළයා තම පියාපත් දිගහැර ඉතා දක්‌ෂ ලෙස පියාසරන්නේ ජානගත දක්‌ෂතා මනාව පිළිබිඹු කරමිනි. තම ආහාරය මල් ආශ්‍රිතව සොයාගන්නා වැඩුණු සමනළයෝ සති හතරක්‌ වැනි කෙටි කාලයක්‌ තුළ තම ජීවන ගමනේ ඊළඟ පරම්පරාව බිහි කිරීම සදහා සුදුසු ශාක තෝරාගනිමින් බිත්තර දැමීම සිදු කරති. ඒ කාලයේ දී ඔවුන් ශාක පරාගණය උදෙසා අමිල මෙහෙවරක්‌ ඉෂ්ට කරන්නේ ශාක ලෝකයේ සපුෂ්ප ශාකවල ද ජීවන ගමන ස්‌ථිර කරමින් බව ඔබට වැටහෙනු ඇත.

ලෝකයේ මේ වන විට සමනළ විශේෂ 18000කටත් වඩා වැඩි ප්‍රමාණයක්‌ සොයාගෙන ඇති අතර වැඩි ම විශේෂ ඝනත්වයක්‌ පෙන්වන්නේ නිවර්තන කලාපීය රටවල ය. එනිසා ධ්‍රැවාසන්නයේ සමනළයන් හමු නො වන්නේ ඇයි දැයි ඔබට වටහාගත හැකි වනු ඇත. ලෝකයේ විශාලතම සමනළයා වාර්තා වන්නේ "පැපුවා නිව්ගිනි"වලිනි. ඒ "ඇලෙක්‌ස්‌සැන්ද්‍රd රැජන ගේ බර්ඩ්වින්ග්" (Queen Alexandra's Birdwing) නම් විශේෂයයි. ඔවුන් ගේ ගැහැනු සතුන් ගේ පියාපත්වල දිග 25 cmක්‌ පමණ වේ. ශ්‍රී ලංකාවේ ද සමනළ විශේෂ 245ක්‌ මේ වන විට හඳුනාගෙන ඇති අතර එයින් 76 දෙනකු ම වඳ වී යාමේ තර්ජනයට ලක්‌ වූ විශේෂ ලෙස රතු දත්ත පොතට ඇතුළත් කර ඇත. මෙරටට ආවේනික විශේෂ 26ක්‌ සොයාගෙන ඇති අතර ඔවුන් බොහොමයක්‌ තෙත් කලාපයට සිමා වී ඇත. ප්‍රධාන කුල (Family) හයකට අයත් සමනළ විශේෂ අතරට 2014 දී එක්‌ වූ නවතම විශේෂය වන්නේ "යෙලෝ µeන්සි" (Yellow Phancy) නම් වූ සමනළ විශේෂය වන අතර මේ විශේෂය හමු වන්නේ යාපනය ප්‍රදේශයෙන් වීම ද සුවිශේෂී කරුණකි. මේ සමනළ විශේෂය සොයා හඳුනාගැනීමේ ගෞරවය හිමි වන්නේ ශ්‍රී ලාංකික පර්යේෂකයන් ත්‍රිත්වයක්‌ වන හිමේෂ්, සරත් සහ චමිත්ට ය. දශක දෙකකට වැඩි කාලයක්‌ තිස්‌සේ ඔවුන් විසින් මෙරට සිදු කරන ලද අඛණ්‌ඩ පර්යේෂණවල ප්‍රතිඵලයක්‌ ලෙස ඒ සමනළයා සොයාගැනීමට හැකි වී ඇත. ඒ අතර පසු ගිය දිනෙක ඔවුන් සිදු කළ පර්යේෂණ ඇසුරෙන් සමනළයන් පිළිබඳ පර්යේෂණවල නිරත වන ආධුනිකයන් හට වැදගත් වන ක්‌ෂේත්‍ර අත්පොතක්‌ A Pocket Guide to the
Butterflies of Sri Lanka" නමින් එළිදැක්‌වුණු අතර ඔවුන් පර්යේෂණ ක්‌ෂේත්‍රයට සිදු කරන දායකත්වය අගය කළ යුතු ය.

වර්තමානයේ සිදු වන නො නවතින පාරිසරික දූෂණයත් සමග සමනළයන් ගේ ජීවන ගමනට අත් ව ඇත්තේ ඉතා දරුණු ඉරණමකි. වන විනාශය, නාගරීකරණය සහ දැවැන්ත සංවර්ධන ව්‍යාපෘති ඔවුන් ගේ ජන්මභූමි සපුරා විනාශ කර ඇති අතර ඇත්තා වූ කෘෂිකාර්මික පරිසරය පවා විවිධ කෘමිනාශක සහ වල්නාශක හේතුවෙන් දරුණු ලෙස විෂ වී ඇත. එසේ හෙයින් තම ජීවන චක්‍රය සම්පූර්ණ කරගැනීමට නොහැකි ව ඉතා දරුණු ලෙස බොහෝ සමනළ විශේෂ වඳ වී යැමේ තර්ජනයට ලක්‌ වී ඇති බව ඔබට වටහාගැනීමට අපහසු නො වනු ඇත. ශ්‍රී ලංකාව තුළ එසේ දරුණු ලෙස තර්ජනයට ලක්‌ වූ මෙරටට ආවේනික එක්‌ සමනළ විශේෂයක්‌ වන්නේ "සිලෝන් රෝස්‌" (Ceylon Rose) නම් විශේෂය වන අතර ඔවුන් ගේ ව්‍යාප්තිය මධ්‍යම කඳුකරයට පමණක්‌ සීමා වී ඇත.

සමනළයන් තම වාසස්‌ථාන කරගන්නා සුවිශේෂී ශාක විශේෂ වෙයි. රනිල කුලයේ ශාක ද, තෘණ වර්ග ද, දෙහි, දොඩම්, කුඹුක්‌, අනෝදා වැනි ශාක පමණක්‌ නො ව යුලෙක්‌ස්‌ (Ulex) වැනි ආක්‍රමණික ශාක ද ඒ අතර වන බව සොයාගෙන ඇත. දළඹුවන් වෙසෙන ශාක හඳුනාගැනීම අපහසු නො වේ. පත්‍රයේ කෙළවරක සිට පිළිවෙළට කා දමන ඔවුහු ඉතා වේගවත් ශාක භක්‌ෂකයෝ වෙති. එනිසා ම කිහිප වතාවක්‌ ම හැව අරිමින් ඔවුන් විශාල වන බව සොයාගෙන ඇත. ඉතා භයානක ස්‌වරූපයක්‌ පෙන්වන දළඹුවන් ඇත්තෙන් ම බොහෝ අහිංසක ය. එහෙත් තම ආරක්‌ෂාව සදහා සමහර දළඹුවෝ විෂ රසායනිකයන් භාවිත කරති. එමෙන්ම අතිශය දක්‌ෂ ලෙස සැඟව සිටීමේ හැකියාව ඇති මොවුන් ගේ ශරීර කදිමට තම බාහිර ස්‌වරූපය පරිසරයට ගැලපෙන අන්දමේ ශරීර වර්ණ රටාවලින් යුක්‌ත වේ.

මීමැස්‌සන්ට නොදෙවැනි ලෙස පරාගණ කෘත්‍යයේ යෙදෙන සමනළයා ගේ දායකත්වය බොහෝ දෙනකු අවබෝධ කර නො ගැනීම ඉතා කණගාටුවට කරුණකි. වර්තමානය එසේ වුව ද අනාගත වැඩිහිටියන් වන ළමා පරපුර එසේ විය යුතු නො වේ. ඔවුන් ගේ දැනුම බහු විෂයාත්මක වන්නේ නම් ජාතික අවශ්‍යතාවන්වල දී මැදහත් තීරණ මගින් සැමට සාධාරණත්වයක්‌ ඉෂ්ට කළ හැකි බව සිතිය හැකි ය.

ආචාර්ය පත්මකුමාර ජයසිංහ